الشاي

Forum Démocratique
- Democratic Forum
أضف رد جديد
صورة العضو الرمزية
Mohamed Fadlabi
مشاركات: 111
اشترك في: الاثنين مايو 09, 2005 6:19 pm
مكان: النرويج - أوسلو
اتصال:

الشاي

مشاركة بواسطة Mohamed Fadlabi »

لن أرى من أحب مرة أخرى
كل يوم تلفحني ريح جنوبية
و يبدو النهر فارغا وسحيق..


............
............

شارعين

بودو لغابة صفرا

و أنا ضل نحيف في المفترق

أختار منو ..?

أنا من زمان مليان غلط

والمرة دي

أنا نفسي أعمل حاجة صاح

أنا نفسي شارع في نهاية تكوني إنتي

زي ما أتفقت معاك زمان

متذكرة ..?

تعبان شديد

الروح حوافا إتآكلت

و مع إني زول هسع ضعيف .. نصو اتحرق

و مع إني و الله لو لقيتك هسي دي

أعمل معاك أحسن من الناس كلهم

أنا بيك بكون أحسن من الناس كلهم

أنا داير أحبك قدر ما الحب بحتمل

أنا ناوي قلبي كلو أكملو في كلامي ليك

و أنا نفسي يوم نتقاسم الليل والرغيف و الواجبات

.......
.......

داير أصحى عليك

أصحى و ألقاك سويتي الشاي

أسمع صوت نفسك نايمة

و قبال ما أرقد أغطيك

أمشي المكتب متأخر

و أرجع بدري

و أموت بالشوق لمن تمشي الجيران

و نتغدى سوا

و نتفرج سوا في التلفزيون

و أغسل ليك العدة

و نتشاكل ساكت .. و نتصالح

ونتونس

عن أي بلاد

أو أي مطر

أهو نتونس

و لمن أبوسك

تفتح نجمات سرية الضو في رئتينا

وتنتظر الجنة خيول دمي

و طيور دمك

و نروح في بعض

داير أصحى عليك

أصحى

و ألاقي عيني في عينيك

......
......

أنا من زمان مليان غلط

و المرة دي

أنا نفسي أعمل حاجة صاح

أنا نفسي شارع في نهايتو تكوني إنتي

وفي بدايتو تكوني إنتي

ونص مسافتو تكوني إنتي

أنا نفسي شارع كلو إنتي



ما إنتي صاح

و أنا نفسي أعمل حاجة صاح
صورة العضو الرمزية
طلال عفيفي
مشاركات: 124
اشترك في: الاثنين مايو 09, 2005 7:19 pm

مشاركة بواسطة طلال عفيفي »

صورة

هي دي ورطتنا يا فاضلابي ..
عاملين فيها فنانين ..
لكن نأتي على مقربةٍ من طرف الدرب ونهيم شوقاً ..
ونتحول إلى قصَاصي أثر .. نتلمس طعم خُطى الراحلين ونبكي ..

نبكي .. لا لأنهن لا يتكررن , بل عشان إحنا لن نستطيع العوده ..

دربنا ممدود ..
وقلبنا دائماً مأخوذ لما كان ..

ترى يا ربي , من سيدفع ثمن هذا الحنين ..


...
طلال



____________________
* أولجا / Olga .
حبر وزيت على قماش .
رسمها وحنً إليها بيكاسو .
العام 1923 .
مصطفى مدثر
مشاركات: 935
اشترك في: الاثنين مايو 09, 2005 10:26 pm
مكان: هاملتون-كندا

مشاركة بواسطة مصطفى مدثر »

جميلة والله يا فاضلابي
أسمع انتو الشاي دا بتشربوه أحمر ولا بلبن؟
عشان أنا أهديت ليك أنت وطلال "لبن" في بوست جديد!
أشوفكم هناك وما تخافوا!!
مصطفى مدثر
صورة العضو الرمزية
Mohamed Fadlabi
مشاركات: 111
اشترك في: الاثنين مايو 09, 2005 6:19 pm
مكان: النرويج - أوسلو
اتصال:

مشاركة بواسطة Mohamed Fadlabi »

طلال

الله المستعان
البنات ..البنات يا صاحبي
الفوضى البخلونا فيها دي و يمشوا
الله يسامحهم


أهو الواحد بعاين ليك ويقول البشوف مصايب الناس ..
صورة العضو الرمزية
Mohamed Fadlabi
مشاركات: 111
اشترك في: الاثنين مايو 09, 2005 6:19 pm
مكان: النرويج - أوسلو
اتصال:

مشاركة بواسطة Mohamed Fadlabi »

مصطفى مدثر

الشاي ده نحن ما ضوقناه خالص
وده المجرسنا
غايتو البركة في اللبن بتاعك الهديتو لينا أنا و أخوي الكاشف
:)
صورة العضو الرمزية
ÃãÇäí ÚÈÏ ÇáÌáíá
مشاركات: 33
اشترك في: الاثنين مايو 09, 2005 9:13 pm
مكان: صنعاء ، اليمن

مشاركة بواسطة ÃãÇäí ÚÈÏ ÇáÌáíá »

ازيك يا ود
طبعاً لو قلت ليك تغسل ليها العدة :roll:
حتقول لي تااااااااني :wink:
وحاقول ليك الله مرقك بس لانه دينا لايجوّز محاكمة النصي بالمرجعي :lol: :lol:
إبراهيم الجريفاوي
مشاركات: 503
اشترك في: الأربعاء مايو 25, 2005 3:31 pm

مشاركة بواسطة إبراهيم الجريفاوي »

[b]يا صاحبي ياهناك

أنت تعرف اعجابي بك شخصياً " صاح"
وانني اعمل لدعمك حياً وميتاً..
و
لكن معليش , احتمل الاتي...
الجمعة الذي هو امبارح القريبة دي :
عماد ببو جيتاريين" ليكتريك" واحد نورمل , محمد عركي ا"أورغ " عجيب كلو كلو
خواجه "كونقة" , قاسم امين" بيز" بكري "ايقاع" غاندي " فلوت" واحسن جهاز صوت في البلد ...
شبكة , قصي , محمد عثمان , ابراس, حامد ابسبح ,
عمار نورالدين , بكري, عزت, ابذر , عمر فقيري ...
"لون"... ويوم والصباح مرتاح مشوا , حكي لي صديقي
ا "اسه" وصديقك سابقاً "احمد سعد "عن علاقته بهذا النص
" مشوا ".. كدت أبكي...
12ساعة غني وونسه ورد فيها اسمك وحكاياك...
الف مرة بشجن وشوق يا صاحب يا فاضلابي يا" دين"
بعدين محمد عبدالعزيز ده غناي "حمار" عديل كده...
ما حاقدر احكي ليك , عشان ما تعملها في هدومك...
وضياء بسلم عليك ...
[/b]
صورة العضو الرمزية
Mohamed Fadlabi
مشاركات: 111
اشترك في: الاثنين مايو 09, 2005 6:19 pm
مكان: النرويج - أوسلو
اتصال:

مشاركة بواسطة Mohamed Fadlabi »

إبراهيم
يا حبيب

سبحان الله ياخي
أمس كنت أقلب إلبوم صور فيه ثواني نفيسة محنطة على ورق مصقول
جواري بنت جميلة كالماء
و كنت عطشان و بي رهق وشوق و مراهقة
أقلب الإلبوم و أرى شبكة
أنظر فأرى قصي و غاندي وببو و عثمان النو و أبوذر و شمت و أحمد سعد و خالد الشلن و كتو
دمعت يا إبراهيم و حكيت للبنت بلغتها عن سحر الأيام في الخرطوم
عن كلما الخرطوم يعاين فيني ليلا
ويفتح النيل فيني نيلا
و أبقى نجمة
رايحة في الليل والضلمة
........
........
أحكي لها: شايفة اللابس أخضر ده .. إسمو شبكة
غناي و وناس و صاحبي
و ده قصي
وده ...
البنت بتقول الأسماء بلكنة مكسورة حاءها مائلة و عينها لينة
أحسست بنفسي باهتا
كحائط قديم
وددت أن أخبرها لكنها لن تفهم
أغلقت نفسي داخلها
و أشتقت
أشتقت
أشتقت
اللهم أنت الصاحب في السفر
و الخليفة ...
اللهم أرحمني و كف عني شوقي و ردني ذات يوم
يا إبراهيم
عندما أعود إلى الخرطوم
سأمشي من مكان ما فيها إلى مكان ما
ثم أبكي جدا
و أستغفر الله العظيم
صورة العضو الرمزية
Mohamed Fadlabi
مشاركات: 111
اشترك في: الاثنين مايو 09, 2005 6:19 pm
مكان: النرويج - أوسلو
اتصال:

مشاركة بواسطة Mohamed Fadlabi »

أماني
مشتاقين
طبعا حأقول ليك تاني
ما إنت عارفة أنا والمرأة علاقتنا وطيدة قدر شنو
لكن جنكم جندرة
الله غالب
خالد الطيب
مشاركات: 300
اشترك في: الاثنين مايو 09, 2005 6:33 pm
مكان: أديس أبابا

مشاركة بواسطة خالد الطيب »

محمد (الفاضل)

سلامات ..

قلت أجي أشرب لي كباية شاي معاك ...

خالد
صورة العضو الرمزية
طارق ابو عبيدة
مشاركات: 404
اشترك في: الاثنين مايو 09, 2005 7:20 pm

مشاركة بواسطة طارق ابو عبيدة »


يا محمد
عليكـ الله تلاته شيشه و بتين










اجملـ قهوه
:D :D

صورة العضو الرمزية
Mohamed Fadlabi
مشاركات: 111
اشترك في: الاثنين مايو 09, 2005 6:19 pm
مكان: النرويج - أوسلو
اتصال:

مشاركة بواسطة Mohamed Fadlabi »

خالد (الطيب)
ALLE I HUSET
دي بقولوها في بلدنا دي معناها ما في زول ناقص
كده البورد بقى زي الورد
(إتفضل جاي
أعمل لك شاي)
صورة العضو الرمزية
Mohamed Fadlabi
مشاركات: 111
اشترك في: الاثنين مايو 09, 2005 6:19 pm
مكان: النرويج - أوسلو
اتصال:

مشاركة بواسطة Mohamed Fadlabi »

غايتو يا طارق شناة طبع شديدة خلاص
ما كفاية شيشتين و بت واحدة
أضف رد جديد