كـــــلام ... فــــاضي !

[سيف اليزل الماحي]

[سيف اليزل الماحي]

[سيف اليزل الماحي]

[سيف اليزل الماحي]

[الوليد يوسف]

الفنان سيف اليزل الماحي

أفكار جميله وواضحة الخطاب زائد خطوط قويه من كل النواحي التقنيه والفنيه وده يا عزيزي كلام مليان طب. كان من زمان وين عجبتني شديد فكرة الكاريكاتير نمره أتنين البتناول العلاقه بين الشمال والجنوب فكرةً وتنفيذاً فيها عبقريه وذكاء فنان عموماً أنا أحب علي نحو خاص فن رسم الكاركاتير بس اعمل حسابك ما يقوموا يقولوا ليك رسومات مسيئه وكده وبعد داك كرعينك ما بتحلك.
نرجوا المزيد يا فنان. وجاييك زي ما بتقول.

وليد يوسف

[سيف اليزل الماحي]

أبو داليـــا
سلام وعيد مبارك
ياحبيب الفن فضلت خيرك
شكراً للمرور الانيق، ولا تحرمنا حلو الشوفات

المودة المابتغباك

سيف اليزل

[سيف اليزل الماحي]

[سيف اليزل الماحي]

[عبد الله الشقليني]

عزيزنا سيف اليزل

تحية لك ولخطك الرشيق في مساحة الفنون ذات الحمولات القصصية .
من يحاول قراءة الخط عندك يلمس جسارة نابضة بالحياة ، خلاقة للمعاني .
ينهض شخصك قوياً في الخط . أذكر هُنا كُتيب صغير كتبه الفنان المصري :
( حسن سليمان ) عن الخط في استقامته وانحنائه ، عن نهضته ونومه ،
عن سيكولوجيته ... وجدت كل المُختبئ هُنا في رسالة عميقة الدلالة .

قال من أعرفه : دوماً التشكيليون يرسمون الكتابة بإبداع التشكيل ،
وأضيف أنا : يرسمون بالكتابة الشفيفة .

شكراً لك .. مع الود والمحبة

[عصام جبر الله]

اسع متلقي الحجج منو
تعرف نوعك ده بكون بفتش لي سبب عشان "يكرتر" القصة

غايتو رسوماتك ما بناباها
لكن الفيك انعرفت

تب

متلقي بن حجج اللبطاوى

[الوليد يوسف]

العزيز الفنان سيف اليزل الماحي ..سلام تاني

بس كنت عايز أسالك عن الكاريكاتير الأخير النزلتو هنا بخصوص بوست ( اوسمان ) في أشاره الي البوست المسخن الكتبو (عثمان حامد) عن (أسامه الخواض) المعني يعني أن البوست ده كلام فاضي ولا شنو؟ لأنو شفتك برضو نزلتو في البوست المعني بعد ما نزلتو هنا وبي كده تكون الرساله واضحه ولا رأيك شنو.

وليد يوسف

[تاج السر الملك]

الأخ سيف
أن كان خير الكلام ما قل و دل..فأن رسومك أقنعتنى بأن الصمت أدل
ياريت الناس لو بتتطلع ليهم ( همبوكة) جنب ريسينن لمن يتكلموا..السودانيين كانوا حيكونوا كلهم محلقين
عمل عظيم..وفى أنتظار المزيد حتى يفك الكجر دة.

[سيف اليزل الماحي]

أستاذنا الشقليني
سلام
وتشكرات على الحضور البهي
مش بيقولوا: الخط المستقيم هو أقرب مسافة بين نقطتين.
مرات تشوف الكلام ده فرية كبرى، حال استخدامه في الرسم فأنا مهتم بحركة الخط وحيويته
حتى في رصدي المستمر لموضوعات المشاهدة البصرية في دراستها وتذوقها،
مش بيقولوا ليك: فلان خطو شين، أها ده كلو من نظرية أقرب مسافة بين نقطتين دي .. وهيهات.
نحمد الله أن ناس الهندسة برضوا قالوا: الدائرة أتم الأشكال الهندسية.
لذلك تجدني مكتول كيرفات ومغرم صبابة، على نهج الصديق مصطفى مدثر
شكرا كمان وكمان لتشجيعك،
وماتحرمنا حلو الشوفات



عصام جبرالله
يا أخانا في التلقي ..

تعرف نوعك ده بكون بفتش لي سبب عشان "يكرتر" القصة

كرترة شنو، يا ود جبرالله وفيك الشراد مو خايل،
وزي ما قال بامسيكا: البوقد النار ليه من حموها يتر
وخليك اون لاين انت

مع عامر الود


عزيزنا الوليد يوسف
خالص تحياتيِ
وحات الخوة يا وليد ما أعنيه بـ ( كلام ... فاضي) هو الكلام الذي يقرأ ولايكون مكتوباً
وحاشاي أن أصف أية مساهمة هنا بأنها كلام فاضي وإن اختلفت معها،
وكما يقال: الحقيقة تبدو ولا تكون، ولاشنو

والمودة المابتغباك


الصديق التاج
سلام وشكراً لمرورك هنا

ياريت الناس لو بتتطلع ليهم ( همبوكة) جنب ريسينن لمن يتكلموا..السودانيين كانوا حيكونوا كلهم محلقين

دي عبارة جبارة وطريفة،
نعم خير الكلام ما قل ودل،
ولأن الكلام من فضة إختار الذهب أن يصمت .. الخ
لكن نوع الناس المحلقين ديل البقنعم شنو.
عموما خلينا نقول: خير الكلام ما دل، حتى إشعار جديد.

مع مودتي للجميع
سيف اليزل