أنـــا زاتي مهمـش

Forum Démocratique
- Democratic Forum
أضف رد جديد
عمر التجاني
مشاركات: 228
اشترك في: الاثنين مايو 09, 2005 6:28 pm

أنـــا زاتي مهمـش

مشاركة بواسطة عمر التجاني »

حكاوي المهمّشين


وأنا ذاتـــــــــي مهمّـــــــش(1)



زي ما بقولك أنا ذاتي مهمّش ، حتى مرة كان عندي استلاب حضاري، مشيت الدكتور ما نفع،مشيت للكجور ما نفع. قمت مشيت للشيخ غايتو جاي، جاي الله يكفينا شر الدهدهة، قام عزم لي. شويه بلا كتير بقيت أقدر أنوم على الجوع. لكن الحمير في طينه الفلس قاعد في محله. الله يقطع الملاريا واليوم الجابه . قام سمعني واحد جلابيته قصيرة قام قال لي- إياك وسب الدهر والأيام- ما فهمت الدهر هو شنو، مو زمنا النحن فيه ده ولا زمناً تاني؟. الله يقطع أبو الفلس . علشان كدي أنا عايز أقاسم الجماعة ديل في الثروة . بس أوعكم تخلطوا الأمور وتقوموا تقاسموني في الثورة . جني وجن الثورة خاصة في بور تسدان ، الله يقطع البعوض، ولو شئت الباعوض ، كله واحد المهم أنثى الأنوفليس، والأنثى هي ذاته مهمّشة . المهم أرجع ليكم لي قصة المهمَــــــــشين . يعني حسع لو حصل وقاموا الجماعة إياهم قسّـــموا الثروة تاني الراء قبل الواو. ياربي نصيبي بي يبقى كم ؟
يا زول ما أطول عليكم أول من قريت الخبر في الجريدة، نبوية الله يرحمها كانت تقول الجرنال، قلت في نفسي لا بد أن نصيبي من الثروة - تاني الراء قبل الواو-، سوف يصلني على داير المليم. المهم طوالي مشيت لي بتاع الكنتين قلت ليه جيب علبتين ساردين، ونص كيلو طحنية ، وشاي لبتون أصلي، والفلوس آخر الأسبوع . قام طوالي مدا الورقة المعلقة على باب الكنتين الدين ممنوع الزعل مرفوع والرزق علي الله. الزعل حصل لأ ني قريت الدين بكسر الدال. قمت قلت ليه أولاً أنا راجل مسلم علي السكين.ما تقول الدين ممنوع والزعل مرفوع والرزق علي الله. عارفين الرزق علي الله. لكن أنا عندي ما يفيد بأن نصيبي من الثروة سوف يصلني. إنت خلي بالك راجل ما مهمّـــــش . ظاهر عليك نصيبك من الثروة (تاني الراء قبل الواو) عايز تاخدوا من نصيب الناس المساكين آه الله يقطع الزعل عايز أقول لك من الناس المهمّــشين.بعدين هو منو القال المساكين ما مهمّــشين . ديل مهمّـشين زينا وواحد. الراجل بتاع الكنتين قام زعل وقال لي . طوّل بالك ! دي زعلتني ليك زيادة. قمت قلت ليهن إنت فاكرني أيه يعني ما مهمّــش . والله أنا مهمّــش نمرة واحد. قام تاني بتاع الكنتين قال لي طوّل بالك. أصبر خليني النكمّـل كلامي . قلت ليه أها كمّــل كلامك داير تقول شنو ؟ قام قال أولا أنا ما قلت الََِدين أنا قلت الدَين يعني السلفة. يعني بالدارجي البي تفهموا كويس ما بديك خردلة . عندك فلوس هات فلوسك ما عندك إتوكل على الباري بدون إحراج . قمت قلت ليه أسمع يا أبني إنت تفتكر ما عندي فلوس إنت ما قريت الجريدة النهار ده وللا شنو . أوعى تكون أمي؟ قام قال لي أمي وللا أبوي أنا ما عايز أقرأ جرايدكم دي ولا بعرف أقرا. بعرف البيع بالسلفة ممنوع فهمت ؟قمت قلت ليهو يا أبني أسمع معليش النفهمك الجماعة ديل قالوا عايزين يقسموا الثروة ( تاني الراء قبل الواو)وأنا الحمد لله طلقت الفلس طلاق تلاتة. يعني لامن نصيبي من الثروة(تا....عرفتوها طبعا) يصلني على داير المليم حأكون غني جدا والغني الله. قال لي يا أخينا أسمع معليش يا عمو الثورة حصلت الحارة ميه وزقة يعني نصيبك يقع في( كرمة النزل1). قلت ليهو يا أبني ما تفهمني غلط الثروة الراء قبل الواو موش الثورة أنا ذاتي لا بحب الحارة الأولى ولا الحارة مية وزقة أنا قلت ليك الجماعة ديل دايرين يقسموا الثروة الراء قبل الواو يعني الفلوس والبترول والدهب والمانغنيزوالمنقة والجوافة والقريب فرت ،و الثروة الحيوانية ،.حتى السمك قالوا دايرين يقسموهو فهمت يا أبني ولا شويه كمان ؟ فهمت ياعمو خلاص يعني أنت متأكد إنو نصيبك حيصلك على داير المليم. بس عندي ليك سؤال واحد لو سمحت ؟ قلت ليه إتفضل يعني اقتنعت بالفكرة؟ قام قال لي أيوه اقتنعت بس سؤالي هو إنت نصيبك شنو من الثروة الراء قبل الواو،فلوس وللا بقر وللا دهب ؟ قلت ليهو أنا ما عارف جايز تكون فلوس جايز تكون معادن . قام قال لي برضو ياعمو ما حاسلفك ولا مليم واحدة؟ ليه يا أبني كفى الله الشر حسع ما كنت مقتنع بالفكرة . قام قال لي ولا زال مقتنع بالفكرة لكن خايف نصيبك يكون السمك الفي البحر.

هامش.


كرمة النزل: بلدة بأقصى شمال بلدنا السودان -1



عمر التجاني
صورة العضو الرمزية
تماضر شيخ الدين
مشاركات: 356
اشترك في: الاثنين مايو 09, 2005 9:14 pm
مكان: US

مشاركة بواسطة تماضر شيخ الدين »

الامضاء:

مهمش بن ابى زعل..
عمر التجاني
مشاركات: 228
اشترك في: الاثنين مايو 09, 2005 6:28 pm

أنـــا زاتي مهمـش

مشاركة بواسطة عمر التجاني »

البارعة تماضر شيخ الدين

أولا أشكرك جدا فما كنت أحسب أن القامات السامقة تخفض رؤوسها لتقرأ شخبطات من هم على قراري. كم أنا سعيد بمثله
محمد عبد الباقي قاسم
مشاركات: 9
اشترك في: الأحد مايو 15, 2005 4:16 pm

مشاركة بواسطة محمد عبد الباقي قاسم »

عمر التيجاني
أشاطركم التهميش وأحزانه ،،،
وأحسن الله قسمتكم ...
صورة العضو الرمزية
نجاة محمد علي
مشاركات: 2809
اشترك في: الأربعاء مايو 04, 2005 1:38 am
مكان: باريس

مشاركة بواسطة نجاة محمد علي »

عمر يا صديقي

في زمن "الطفابيع"، على حد تعبير بشرى الفاضل، اتسع الهامش واتسع، حتى أصبحت كل صفحتنا هامشاً.
في انتظار المهمش (2)، لك خالص الود.

نجاة
عمر التجاني
مشاركات: 228
اشترك في: الاثنين مايو 09, 2005 6:28 pm

وأنا ذاتـــــــــي مهمّـــــــش(1)

مشاركة بواسطة عمر التجاني »

الأستاذ محمد عبد الباقي قاسم

مثلك ممن يملك ناصية الحرف أعتز بمروره وقراءته شكرا.
أم فاطمة نجاة
أخاف أن أطلق عليك أم المنبر. أخاف من( الكلمة) وأيقن تماما بمضمونها .شكرا لك أم عزة.
أضف رد جديد