جقله الأخرى - إلى عزت الماهرى، وعموم عشاق الأرض

Forum Démocratique
- Democratic Forum
أضف رد جديد
صورة العضو الرمزية
ÃÈæ ÐÑ ÈÇÈßÑ
مشاركات: 31
اشترك في: الأربعاء يوليو 20, 2005 12:10 am
مكان: جدة - م. ع. س

جقله الأخرى - إلى عزت الماهرى، وعموم عشاق الأرض

مشاركة بواسطة ÃÈæ ÐÑ ÈÇÈßÑ »

جقلة معلقة فريدة، صاغها واحد من شعراء بطانة "اب على"، يصف فيها ناقته، عشقا وولها وإجلال وتكريما لكل الإبل عبرها

هو الشاعر المجيد يوسف عبد الله البنا

القصيدة فى مجملها، وصف وتغزل فى جقلة، وجقله هنا ليست ناقة بعينها، بل هى تمثيل لكل رصيفاتها فى كل بوادى السودان الوهيطة عميمة الخير، كما قال فى أحد المقاطع " جقله صعيد وجقله السافل جقله الغرب وجقله سواكن" وهى غزل فى محاسنها وميزاتها وخيرها العميم، كما سوف نجد الإشارة الى اسماء العديد من مشاهير رجال الإبل فى منطقة البطانة، مثل ود شنتير ومحمد ود حمدنالله ، والصديق ود اب دم من البطاحين وحسن حامد وود عويضه،
وإلى هذه القصيدة الرائعة الفاتنة


البلا فيكِ يا الشَنقا الطويلة أم شُوشه
البلا فيكِ يا الرُقِك مِقاشر الحُوشه
البلا فيكِ يا الفيكِ الرجال مغشوشه
مون عارفين كُناجك مُر بسوى الدوشه

الشر فيكِ يا الشنقا البهبهب عُرفك
مارقة رِدوف مِسعبته راعيه قنطار جرفك
يودر سيدو لابُد فى المحافل ظُرفك
بطلب ربى ليك يا أُم الحوار ما يصرفك

يام راساً مَتربش وللمحن جيابه
الله يلادى محنك يا الردوف وعذابا
ديمه معينة البلد البعيد تتشابا
يتقنت مباريها أب رِدِق ساكلابا

معروف الكُناج فوق جقله
مهله رتوعها فى الإيد أم مقاما شقه
ما بُرضى العوج فارسها يومها التقله
عارف كل روحا للتراب منتقله

يا جقله العقيدك بكّر
فارسك ديمه فى بلد العد بيتوكر
ناس بقره وغنم أنا عندى ما بتتشكر
لبنك فيو طب للماسكو مرض السكر

يا جقله التمونك غاليه
ناس منك غِنو صبحت جيوب ناس خاليه
ديمع عليك فى الروح العزيزه مباليه
يا الشنقا الغرابية أم سراةً عاليه

جقله سعادة الولد المكٍتر فيها
جقله شقاوة أب حظا بقى مخاتيها
جقله عقيدها فاقر بالهويد والتيهه
جقله مردمه الشر فوق عوالى سريها

جقله سعادة الولد السعى وولدتّا
جقله شقاوة أب حظاً أبا يقالدتّا
تشبّع سته كان إتكمّشت عتمتّا
دى أم دمسه الخداريه الغليد فاسدتّا

مرات دارّه مرات هى ومره بسوط
ترى دا البجبر الزول للدرك والموت
جقله تملى ناجعه مشرته السبّوت
جقله بترتع البلد المقامو التوت

جقله بتجدع الفارس نجيض كلفوت
إلا إن ولعت نيرانها ما بتموت
جقله العفه جقله الفوت
جقله الخير وجقله الشر جقله الموت

با م شعفه التملى مكربات شيحانك
مع البياح بطنن للعتم حيرانك
شنقا وفيك كتانات وماضى جرانك
يا الدبسا العكل يوم حربتك دخانك

جقله صعيد وجقله السافل جقله الغرب وجقله سواكن
جقله معزة أم حسساً مطول ساكن
جقله ولدتا ميلان ناس مصر مساكن
حمرا وليها طيار ريش وخفها ماكن

جقله مكجنه الحله ورباط البيت
ديمه مرادا فى الحدب أب وحوش بتبيت
جقله عقيدا للمطموره ديمه شطيط
جقله بتجرد البنك إن جرت مربيت

الرزامه حنت للبروق الرفّن
دايره تراتع الصيد أب طبايعن عفّن
جقله جمالها عقرن بالمهاوى ولفّن
دايره صمود مكوك ما بحدروها درفّن

يا التحت الرشايم زام مصع مهدودك
من دون السعيه التانية نادر عودك
تمنك غالى بالحيل كان لبستى عقودك
قبال تسعه يوم جرد البنوكا قَعُودك

جقله الماها بقره عُقَداها ديمه يزربو
فوق الجوع تصابر والعطش تسفربه
عندها طبعه يوم تنوى الرَفَق بتخبرو
عيصها يقلّم الحطب الصريع يفطربه

يوم عُقَداها فراحى يِفُويْتُو
يوم بتسادر الوعر المكاجه رِوِيتو
يوم مبروعه فوق تب صافى نقعت مويتو
يوم حازمها كير راش بوله فوق هبويتو

يوما بى لقيط حنتوت مفرق سارحه
يوم من ريح دعاشاً هب بتربع مارحه
تتم الكيف أكان مصعت تلوبها القارحه
جقله الفيها حظ البى فسل مى مصارحه

الرازمه حنّت دايره صدر الغُر
تطاردبو المفرق وفوق جناها تدُر
جقله معزة الدعج الوضيبها بجُر
ضايق فيك حمدنالله الكناج المُر

يا الصمدك مِشربِت بالهويده ولاف
عناية بعيد ما بهددوك بجفاف
اُمحُمد ود حمدنالله الطبايقو عُفاف
دافع فيكى كمين شوع مسارعو خُفاف

يا الصمدك مشربت وديمه قال كورو
شنحيبك وسيع الصى بيمحقو جورو
ديمه مسادره بالبلد البِريع عتمورو
ود أب دم محمد يوم لُقاكى بدورو

هنية المهرك من شوحه رابطلك مارسك
وإتمقنعت حررّت وبعاين حارسك
لاكين مستحيل تنطاقى للما دارسك
الصِدّيق عمر اب دم عقيدك وفارسك

شرِك داسّا فى لبادك الإتلبك
ما بتنطاقى يوم صدفك نحاسو اتهبك
جقله معزة الرُشرُش عيونها مشبك
ناقد فيك حسن حامد نواقى دبببك

وأصلو الناقه صيد ما بتالف المردود
ناجعه تملى بى واسع الخلا الممدود
جقله مسمّحها الإتعطر المهدود
بِحس عزها ود عويضة أب مسكنا فى دود

مرّاتاً تحير راشدا الداريها
مرّاتاً تحن تابعة البزيم بكريها
مرّاتاً عجوف عادمه اللحم فى سريها
مرّات الردوف دارجا وبيحن باريها

مرّاتاً تبادر مطبق الجبّال
مرّاتاً تقنجر بالهويد والنال
مرّاتاً تتم الكيف وراحة البال
مرّاتاً تخُته حوار ومره عجال

يا جقله السبيب راسك برايو بيقج
كدى شوفينا كان من الزبيدى نكُج
يام شرفاً مدشر بالبطانه بِدُج
ضوقى العزه والجبخانه ها البترُج

فيها الخالفه فيها الداره فيها الحايل
فيها بنات لبون رُق البكار وشوايل
مرابعه الصيد وضاربه عسين وراشه اسايل
جقله مكملة الفرسان وفاتنه قبايل

جقله معزة الدعج الخصالها حميده
ضاقت ترعى فايقه وضاق مٍرَوِق سيدا
ضاقت داقنت وحدتا متل الصيده
ضاقت مارقه من ركب المهاجره جريده

جقله إيّاها فراجة الكرب والصرمه
شنحيبا المفرق فوقو خايله الهرمه
اترزمت سرّاتا وقنبت منبرمه
فى القيزان تطارد فى القتب والدرمه

جقله عزيزه فى معناها
الفتنة البتاخذ سيدا كم جايباها
أنا شفت أب قدم ما برحم اللاقاها
لى ضيفانو بيضبح وديمه دافعو جناها

جقله حِداها العند المحاصات عرضو
كناجها تقطع الوردان مرارة قرضو
عتيمها يعالج المرضان يفجر مرضو
فرسان الهواوير تسعة فوقها انقرضو

يا جقله العقيدك حارص
لبنك كلو بصلح كان حليب كان قارص
رُقِك شمّ نسّام الدعاش قام تارس
دايره تعرضى تابعاهو إلا نترِك فارس

ويوما بى لقيط حتوت معاه شرى
يوم عانيه البروق مجموعه شاقه الصى
جقله معزة ام جمراً مولع حى
الموت فوقكّا لا اقول ليك ولا تقول لى

جقله كناجها فرسانها السمان درقكِن
فى بحر الهلاك طايعين غصِب غرقكِن
ود شنتير كتير فوق نارا كفى درقكِن
علّب نار كدوسو وفى الرضيمه حرقكِن

جقله الخير وجقله الشر وجقله عذاب
جقله كناجها للفرسان قعد بنهاب
سافكه دموم وهالكه ديوش وخاربه خراب
سبب الفتنه بين ود قجه والنوراب
صورة العضو الرمزية
íæÓÝ ÚÒøÊ ÇáãÇåÑí
مشاركات: 326
اشترك في: الاثنين يونيو 06, 2005 9:50 am
مكان: كندا =Winnipeg -MB

Re: جقله الأخرى - إلى عزت الماهرى، وعموم عشاق الأرض

مشاركة بواسطة íæÓÝ ÚÒøÊ ÇáãÇåÑí »

الرزامه حنت للبروق الرفّن
دايره تراتع الصيد أب طبايعن عفّن
جقله جمالها عقرن بالمهاوى ولفّن
دايره صمود مكوك ما بحدروها درفّن



العزيز ابو ذر

قال لنقيبها :

ود يُمى العَرور الحــارّه ما بِحملها
وبعرف جَلسِة السّكرَه الكَبير جَردلها
جقــــــــــلا أُم ميلا جيّابِة الدَّرَك لوزرها
لا بِدنيها لا بسأل بِقول في خبرها !!

هكذا هي خطوتها ، منذ أن فارقت مراح صالِح ، منذ أن كانت الارض مبسوطة لخطوتها ، منذ أن عرفَت طعم الماء والقُلم والحنتوت .. وحتى مغيب شمس المسارات ستظل ملهمة الغناء ، ستظل أسطورتها تدور مع الريح مع بُرّاقة الرشاش ... من السافل الى تشابك الغابات ستسير وعشاقها على سروج النشيد يخبون خلفها ، هي القصيدة وليست الرّاعية في الفلاة ، هي عشم الطّميح وحلل الصّرمان ..هي الذاكِرة حينما نفقد بوصلة الحلم .

شكراً لهذه الابيات التي كشقت لي إنهم هم بغنائهم وبعشقهم اينما ساروا.
لي رغبة في التعرّف أكثر على شعر البطانة البدوي .. قبل سنوات طويلة حمل أحد العابرين شريط طه البطحاني وريّة الى باديتنا وقتها كنا لا نعرف إن هنالك غيرنا يسعون الناقة ويغنون لها .. وبالتأكيد لا أحد يعرفنا أيضاً واذكر إن ذلك الشريط تناقله الناس كأي إكتشاف عظيم وإستمعوا له بخشوع وحفظوه واضافوه بسهولة إلى اسطورتهم حتى اصبحت ريّا ماهرية او محمودية هذا إذا لم تكن الرّيلة ذاتها او ريلو .. فكما تعرف ذلك العالم يطوع كل شيئ لحياة النشيد ، ويمحو المسافة بين عشاقها ويقارب بينهم أينما وجدوا ..
لا ادري لماذا كتبت جقلا بالهاء المربوطة ؟؟؟ لأنها بالالف تبدو لي مطلوقة أكثر ، فالهاء عقال لخطوتها .
فلتمشي إذن
شكراً لإهدائك لي هذه الابيات ولشاعرها نمّة أخرى


ود يُمى العَرور ورّد بقيروا سقاهِن
عقّدن روكَبَن أخيان الرّقيقة معاهِن
يوم الليل بَرد والدّرب المطلوح جاهِن
قلعن كُمبليت ربَط العجاج في قفاهِن


.......
وقالت إحدى الزياديات في زيارة لها لسوق مليط وهي قادمة من البادية ولأول مرة تكتشف المدينة :
قالت
مليط الدّبلة
أخير من أبّوتي بي إبله


وهذا سؤال لدكتور بشرى الفاضِل ترى اين توجد المدينة ؟؟ هل هي في خطى جقلا أم في الطين ؟
أضف رد جديد