ما هو فخرنا في السودان؟! Our national pride
انتقل الى صفحة 1, 2  التالي
 
انشر موضوع جديد   رد على موضوع    sudan-forall.org قائمة المنتديات -> منبر الحوار الديمقراطي
استعرض الموضوع السابق :: استعرض الموضوع التالي  
مؤلف رسالة
محمد جمال الدين



اشترك في: 09 مايو 2005
مشاركات: 1838

نشرةارسل: الثلاثاء اغسطس 09, 2011 4:28 pm    موضوع الرسالة: ما هو فخرنا في السودان؟! Our national pride رد مع اشارة الى الموضوع

ما هو فخرنا "الوطني" في السودان؟. Our national pride?

ذاك السؤال الذي بدأ عندي صعبآ كان سهلآ لدى الآخرين!. حدث ذلك قبل عدة أيام أثناء دورة تدريبة ضمتني وآخرين من عدة جنسيات من قارات مختلفة بضاحية سوستربرخ وسط هولندا.
وفي بداية البرقرام وعند لحظة التعارف سقط سؤال: ال "Pride"؟

قال الأمريكي: تمثال الحرية.
قالت الجنوب أفريقية: نيلسون مانديلا.
وقال استاذنا الهولندي: طواحين الهواء وفان جوخ وفريق إياكس

كانت الإجابات تأتي بشكل تلقائي وكأنها عفو الخاطر!.

وقالت البقية من الناس بأسماء زعماء سياسيين أو عظماء في العلوم والأداب وإلخ كما عدد من الرموز الأخرى المادية أو/و المعنوية مثل الفرنسية التي قالت ببرج إيفل والثورة الفرنسية.

وعندما جاء دوري بدأت مرتبكآ بعض الشيء وكنت في حيرة من أمرى أمام سؤال بسيط وعادي أجابه الآخرون بكل هدوء وبساطة. كانت تلك أول مرة أواجه فيها بمثل ذاك السؤال. كانت الأفكار متزاحمة في رأسي ولم أستطع النطق مباشرة فعللت لحظة صمتي تلك بحيلة أن رموز الفخر عندنا في السودان كثيرة بحيث تجعلني في حيرة من أمري. وللحق فقد دار في رأسي: الأزهري، محمد أحمد المهدي، عبد الله التعايشي، الطيب صالح، فرح ود تكتوك، محمود محمد طه، عبد الخالق محجوب، المك نمر، ود ضحوية، خليل فرح، ود حبوبة، مهيرة بت عبود، بنونة بت المك نمر، ود بدر، حسن ود حسونة، جبل التاكا، جبل مرة، البحر الأحمر، الإهرامات، أركماني، بعانخي وجبل البركل.

لكنني عدلت عن كل ذاك وقلت: النيل
The Nile
فهل تلك إجابة صحيحة على السؤال؟.

وماذا لو قلت بأي من الأسماء والرموز السابقة؟.

هل ووجه أحدكم من قبل... أو فكر في مثل هذا السؤال البسيط؟. ماذا كانت الإجابة؟.

بالمناسبة كانت معنا إمرأة كندية عندما جاء دورها أجابت بأنهم في كندا لا يملكون رمزآ ماديآ ولا معنويآ للفخر الوطني. كدا بس!. هل في زول عندو رأي زي دا؟.

تحياتي

محمد جمال


انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
النذير حجازي



اشترك في: 11 يناير 2008
مشاركات: 535

نشرةارسل: الثلاثاء اغسطس 09, 2011 7:21 pm    موضوع الرسالة: رد مع اشارة الى الموضوع

سلام يا محمد جمال ورمضان كريم

للاسف يا محمد نحنا ما عندنا شيء نفتخر بيهو، وحتى النيل الذي ذكرته لا يعد فخراً لان الطبيعة قد حبتنا إياه، ولم نبنيه بأيدينا، ولكن إهراماتنا على صغر حجمها فهي إمتداد لإهرامات الجيزة فهي تعد المفخرة الوحيدة لنا.


بالمناسبة يا محمد قد حدث لي موقف مُشابه تماماً لموقفك، ففي أثناء تحضيري لرسالة الماجستير في الهندسة المدنية في جامعة نورث كارولاينا آت شارلوت، شلت لي كورس صيفي عن جغرافية نظم المعلومات Geographical Information System-GIS فبما أنه كورس صيفي فقد شارك في هذا الكورس عدة طلاب من جنسيات عديدة نسبة لميزة Exchange Program والتؤمة بين الجامعات العالمية، أي بإمكان كل طالب أن يأخذ كورسات صيفية في أي جامعة من الجامعات العالمية في أي بلد في العالم وتُحسب له عدد ساعاتها في جامعته الأم، فقد كان من ضمن الجنسيات: الألمانية ، الفرنسية ، الكندية، البرازيلية، اليونانية، الصينية والتايوانية، المهم قد طلب البروفيسور من كل طالب أن حضر سمناراً عن نظم الـ GIS في بلده، فعلى الرغم من أنه طلب بسيط جداً لجميع الجنسيات، إلا عندي فقد كان ضرباً من ضروب المستحيل، فذهبتُ إلى البروفيسور وقلت له أنا من دولة نامية وليس لدينا نظام الـ GIS في بلدنا، فقال لي يمكن أن تتحدث عن أي موقع للــ GIS في أي بلد عربي آخر، وبعد بحثي المضني، لم أعثر على أي أثر للـ GIS في أي دولة عربية، وآخيراً وجدتُ موقع أمريكي للـ GIS عن العراق، وقد أنشيء للتجهيز للحرب، فعلى الرغم من إني ضد الحرب على العراق، أضطررتُ لاستخدامه، وبالجد يا محمد نحنا عبارة دول العالم الثالث دي كتيرة علينا.

تحياتي

_________________
give me liberty or give me death
انتقل الى الاعلى
استعرض نبذة عن المستخدمين ارسل رسالة خاصة
سيد أحمد العراقي



اشترك في: 21 يونيو 2009
مشاركات: 624

نشرةارسل: الثلاثاء اغسطس 09, 2011 7:22 pm    موضوع الرسالة: يا أيها الرجل المسافر فى التساؤل...أتكن لى بعض المودة؟؟؟ رد مع اشارة الى الموضوع



شيخ المتسائلين / محمد بن جمال الدين
الأستاذ / النذير حجازى
كيف حالكم

حيرتك حول رمز الفخر الوطنى هى رأس جبل الجليد الذى هو واقع حالنا الوطنى؟؟؟الى أين نسير؟؟؟ وكيف؟؟ ولماذا؟؟؟

عن رمز الفخر الوطنى قد يتبادر للذهن إهرامات البجرواية...البركل ...نورى ....نبتة...ماتبقى من كوش...الخ

ولكن هل نحن مجمعون عليها...أم أنها مثل المهدى والرموز الأخرى ....كل رمز حوله البعض ملتفون؟؟؟

النيل مورد طبيعى وجدناه , لم نشقه ولم نروده, وكبقية مواردنا الأخرى لم نستفد منه بالقدر المعقول دعك من الكافى الى الآن؟؟

المفقود هو البناء الذى يحعل الجميع يرون ان بعض الأشياء لها معنى واحد من ناحية الدلالة

أخشى ان تمضى وتروح أيامنا تلفتا ودون إجابة على الأسئلة التى تورقنا؟؟

لك المودة ودع باب الأسئلة مشرعا...بعضها سيجيب عليه الزمن وبعضها نحن وبعضها أجيال قادمة ولا إجابة نهائية لما يرى ويريد الناس

سيدأحمد العراقى
انتقل الى الاعلى
استعرض نبذة عن المستخدمين ارسل رسالة خاصة
محمد جمال الدين



اشترك في: 09 مايو 2005
مشاركات: 1838

نشرةارسل: الثلاثاء اغسطس 09, 2011 7:57 pm    موضوع الرسالة: رد مع اشارة الى الموضوع

نعم يا صحاب... هو أمر عجيب!.

لاحظو يا نذير وسيد أحمد... كيف تفاعل الصحاب الآخرون في الفيسبوك مع المعضلة في خلال ثلاث ساعات فقط... وهم ما يزالون يفعلون المزيد:

3 hours ago · Like ·
وعد النوار ‎^_^
3 hours ago · Like
Mohamed Gamaleldin تمامآ هو ما حدث يا وعد... كيفك؟
3 hours ago · Like
Mohamed Gamaleldin وبالمناسبة أنا شخصيآ فخور بحاجة تانية أكتر بكثير من النيل ومن كل ذاك ""؟""" وهي.......................​.؟
3 hours ago · Like
Mustafa Saeed النوبا -الحضارات في الشمالية
3 hours ago · Unlike · 1 person
Mustafa Saeed كلمة نوبة في اللغة النوبية القديمة تعني الذهب وارض النوبة هي ارض الذهب
3 hours ago · Unlike · 1 person
Mohamed Gamaleldin نعم يا مصطفي سعيد ذاك مصدر فخر عظيم وقد أعتبرته أعلاه في بعض رموزه
3 hours ago · Like
Mohamed Gamaleldin بس أنا عندي حاجة تانية "؟"
3 hours ago · Like
Mohamed Gamaleldin والحاجة دي هي "نحن" الشعب!
3 hours ago · Like · 1 person
مي ابراهيم لانستطيع ان نفخر بالنيل لاننا ليس لنا دور في وجوده عندنا. i..الفخر يكون بانجاز مادي,,,,,فكري ,,معنوي,,,
2 hours ago · Unlike · 1 person
Mohamed Gamaleldin شعب عظيم ومختلف لم تشغله الكوارث والمسغبة والمأساة والحروب الطاحنة والكيزان من أن يتحابب ويحلم ويكتب الشعر
2 hours ago · Like
Abuagla Abusinn شعبك اتللللللللللحس Sad
2 hours ago · Unlike · 1 person
Mohamed Gamaleldin دا كلام مهم وخطير ووجهة نظر في غاية التحدي يا مي إبراهيم
2 hours ago · Like
Mohammed Farouk Salman يا صديقي حيرني اكثر منك وجود ما هو "وطني" اكثر من ما هو "فخر"
2 hours ago · Unlike · 1 person
وعد النوار الحمد لله Smile
موضوع شيق..
إدريس جماع في رحلة النيل:
و النيل من نشوة الصهباء سلسله
و ساكنو النيل سمار و ندمان
و خفقة الموج أشجان تجاوبها
من القلوب إلتفاتات و أشجان
كل الحياة ربيع مشرق نضر
في جانبيه و كل العمر ريعان.
لكن يبقى الزول بتركيبته الخاصة..فخري و رهاني الدائم.
2 hours ago · Unlike · 1 person
Mohamed Gamaleldin المعجزة يا أبوعاقلة.... المعجزة الخطيرة... إنو ما إتلحس كلو لسه : )... شفت كيف؟. مش أنا قلت ليك دا محل فخري... بعدين التلات ترباع الإتلحسو من الشعب إتلحسو بشرف
2 hours ago · Like · 2 people
وعد النوار النيل يا مي..صنع وجودنا..
ردا" على قولك(لم نصنع نحن وجوده)
2 hours ago · Unlike · 2 people
Mohamed Gamaleldin وصديقي محمد فاروق عندو رأي صعب!...... الوطني ذاتو هو شنو؟. (مشتاقوووون يا إبن فاروق))) أعلم أنك في أستراليا أو شيء من هذه المنافي
2 hours ago · Like
Mohamed Gamaleldin والله يا وعد كلام مي دا محتاج تفكير شوية!.... نعمل معاها شنو؟. فعلآ النيل هو هبة الطبيعة... نحن عملنا شنو بيه؟. ممكن بس نقول حضارات الماضي... كمان برضو النيل ما حقنا برانا... منابعه ليست عندنا ومصبه أيضآ ليس في ديارنا... مي قصتها صعبة بصراحة... مع أني بحب النيل وعندي شعور أنو هو مصدر فخر... ليه ما عارف!
2 hours ago · Like
Mohammed Farouk Salman محمود محمد طه قتله ابناء وطنه، الماظ وعلي عبد اللطيف قتلهم اكثر اولاد "البلد"، المهدي والتعايشي قتلوا من ابناء البلد اكثر من ما قتل الدفتردار واكثر من ما قتلوا من الترك، ود حبوبة لو لم يعدموه لما قام مشروع الجزيرة، واخشى ما أخشاه ان عدنا للوراء...ان نجد ان عجوبا التي خربت سوبا من رموز فخرنا اكثر من ود تكتوك فلولاها لما دابت ممالك النوبة المسيحية كفص ملح في ماء ولما كانت سنار او ودتكتوك!!
2 hours ago · Unlike · 1 person
وعد النوار لأنو دمك يا عزيزي..دم أبوك خالك و أمك..دم ولدك صاحبك و عمك..
2 hours ago · Like
Mohammed Farouk Salman انا في الخرطوم، او ما تبقى منها بعد ان اصبحت عاصمة نصف الوطن، وشيء من تلك المنافي...
2 hours ago · Unlike · 1 person
وعد النوار و النيل طفل الحبشة و قلب أفريقيا..
زهو صباه و شبابه و عنفوانه في أرضنا نحن..يقبله عندنا عطبرة و الدندر و الرهد..نبارك على ضفتيه زيجاتنا..و يغسل منا الرهق و العنت..نأتيه متسخين بنا ..و نغادره_و لا يغادرنا_ طاهرين به..
نهر الجنة و ربيع الفؤاد.
2 hours ago · Unlike · 2 people
Mustafa Saeed نحن شعب مضلل -لا أحد في كل هذا الشعب الماشي على الأرض يستطيع ان يعدد لك ماهي حقوقه وواجباته الدستورية تجاه بلده -هذا لا يعني الناس في بلدنا -لذلك نحن شعب رهن عملية تغييب واسعة الانتشار للأسف
2 hours ago · Unlike · 1 person
Mohamed Gamaleldin حلوة دي يا محمد فاروق "عجوبا" ههههههه والله دي لقطة بارعة... والله رائع... إيه رأيك أنا المره دي محيراني ومكسراني شديد ومعجب بي مقدراتها على ممارسة المؤامرة السياسية كونها المثال الوحيد الذي يفوق الكيزان عندما نسيء الظن بهم فيفوقون سوء ظننا: )... نضمها لمصادر الفخر الوطني
2 hours ago · Like
Mustafa Saeed فقط نعمل من اجل الأكل والشراب والزواج والانجاب -العقول تمارس عليها سياسة التهميش
2 hours ago · Like
Mohamed Gamaleldin وعد النوار تدافع عن النيل العظيم بشراسة وإستماتة والمواجهة مستمرة... هي معركة الأزل وربما الأبد
2 hours ago · Like
Mustafa Saeed ان تموت حرا خير من ان تعيش اسيرا
2 hours ago · Unlike · 1 person
Mustafa Saeed قسما بما في تربك الكريم من رفاة أبائي الكرام -قسما ببسمة الوليد تستخف بالردى تؤجج الضرام -سنبنيك ياسودان
2 hours ago · Unlike · 1 person
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الثلاثاء اغسطس 09, 2011 8:03 pm    موضوع الرسالة: رد مع اشارة الى الموضوع

مع ملاحظة أن الحديث في الفيسبوك غالبآ ما جاء عفويآ ودون مراجعة أو كثير تمحيص لكنه كثيرآ ما كان صادقآ وسلسآ ومعبرآ عن القضايا محل النظر.

شكرآ للصحاب هنا وهناك.

حبي وتحياتي

محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الثلاثاء اغسطس 09, 2011 9:49 pm    موضوع الرسالة: رد مع اشارة الى الموضوع

عجوبا "الخربت سوبا" دي منو؟.

يعني نحن عندنا كوارث من بدري... عشان ما إجي طيب صالح جديد متعجب ليقول لنا من أين "أتى هؤلاء؟" وكلنا إفتكرناهم من مصر (إخوان مصر وتاريخ مصر وعمايل المصريين)... بس طلعوا من عندنا "أولاد عجوبة مش بمبة" : )
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الثلاثاء اغسطس 09, 2011 10:03 pm    موضوع الرسالة: رد مع اشارة الى الموضوع

عجوبا

هل عجوبا الخربت سوبا ممكن تكون أحد رموز فخرنا؟. ليه لا؟.

ممكن نتعرف عليها شوية؟.

ليه ما تكون؟ ... مش هي أول زول عمل تغيير جذري نحو السودان الجديد "العربإسلامي" على رأي حسن موسي.

والمقترح من صديقي محمد فاروق سليمان بتصرف مني. هي تلك المرأة التي هزمت التاريخ!.

رأيكم شنو؟. (((فإن كانت قد خربت سوبا فقد بنت سنار... ثم بنت وعينا جميعآ)))... لماذا نتنكر لأهم وأعظم جداتنا؟.

والقصة الأهم دايرين مزيدآ من التعارف على "عجوبا" ؟.


إمكن نطلع برمز وطني حاسم يتفق عليه الجميع.... مندري!.



تحياتي

محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
عيسى يوسف



اشترك في: 26 يوليو 2006
مشاركات: 26

نشرةارسل: الثلاثاء اغسطس 09, 2011 10:57 pm    موضوع الرسالة: رد مع اشارة الى الموضوع

سـلام يا محمد جمال والشباب،،
كدة في البداية إنت في مثالك ذكرت عدد من الشخصيات السودانية، من ترهاقا لا عند عجوبة! رغم أن إجابتك في السمنار كانت النيل.. أنا شايف إنو في فرق بين الشخصيات العظيمة في بلد ما وبين الفخر الوطني حسب تسميتك.. وزي ما قالوا بعض الشباب إنو النيل لا يصلح أن نقول عنه فخرنا الوطني لأنو نحنا ببساطة ما عملناه، وليس من منجزاتنا كذلك الشخصيات أو الناس العظيمة دي برضو بمعنى نحنا ما عملناها رغم كوننا نفخر بها.. لكن ممكن أتفق جزئيا مع النذير إنو نحنا ناس العالم العاشر برضو منجزاتنا ويمكن شخصياتنا على قدر حالنا برضو! وحتى ولو كانت في نظرنا هي عظيمة لكن لأنها ما عندها شهرة عالمية زي تمثال الحرية أو فان خوخ.. وللمناسبة ولو تذكر قبل سنوات قليلة كان في مسابقة أو إستطلاع في هولندة لاختيار أعظم عشرة ناس على مر التاريخ الهولندي وتراوحت الإجابات ما بين فان خوخ (فنست وليس تيو!)، وفيلم فان أورانيا وبم فورتاوين! ويوهان كراويف الخ، نحنا برضو عندنا عظمائنا الفي نظرنا ما أقل من ديل وإنت ذكرت أمثلة عديدة.. وأذكر أنو أنا عملت استطلاع مشابه في الأونلاين وتراوح الإختيار بين نفس الذين ذكرتهم مع بعض الإضافات.. أذكر أن الأستاذ فضيلي جماع قد نبهنا للسلطان عجبنا (التاريخ السوداني يذكر الأميرة مندي وبطولاتها أكتر من أبوها السلطان).. على أية حال، داير أقول نحنا (قد) يكون عندنا ما نفخر به، لكن لا أحد يعرفه بعيد عن السودان، بل لا أحد يعرف السودان في عضمو!.. وتحضرني مناسبة تانية، وفي مهرجان في هولندة برضو قبل سنوات عديدة كانت هناك فرقة موسيقية زعموا أنهم بعرفوا نماذج لموسيقى أي بلد في الدنيا، وبطلبوا من الحضور يختاروا البلد ليعزفوا ليهم منها، تقدم (أبوالحسن محمد نور) وبمجرد ما قاليهم السودان قعدوا يتلفتوا! وعشان ما يصعّب عليهم الموضوع قام قاليهم: عازة في هواك، فلم يفتح الله عليهم بكلمة أو جملة موسيقية،، قاليهم: إزيكم، فما فهموا حاجة، ولأنو هو نفسو عازف قام طلب أكورديون منهم وعزف ليهم (أجمل الحلوين).. كل الفرقة وكل الحضور وقفوا على حيلهم وصفقوا ليه!.. لو رجعنا لموضوعنا وبقينا نفتش على (مفتخراتنا) ـ لاحظ نفتش ونفكر يعني ونبحت ـ ممكن نلقى منجزاتنا (السياسية؟) كالثورة المهدية وأكتوبر وابريل.. على فكرة ما قريت الكلام النقلتو من الفيس بوك لأنو ما overzichtelijk وربما يكون فيه أمثلة أخرى مشابهة..
انتقل الى الاعلى
استعرض نبذة عن المستخدمين ارسل رسالة خاصة
حاتم الياس



اشترك في: 23 اغسطس 2006
مشاركات: 803
المكان: أمدرمان

نشرةارسل: الثلاثاء اغسطس 09, 2011 11:12 pm    موضوع الرسالة: رد مع اشارة الى الموضوع

أظننى حكيت هنا عن طرفة قريبى شاعر منطقتنا والذى قال فى محبوبته أجمل القصائد البديعة والجميلة
سارت بها الركبان وحجلت دوائر الافراح ببحة ورنة طنابيرها وزغاريدها و(عرضاتها) و(بطانها) لكن يبدو ان بعض مثقفى المنطقة ممن غاروا من شهرة شاعرنا البسيط فى تلك الحلال ارداوا أن يقيفوا من شهرته هذه وصيت اشعاره فى حبيبته موقف نقدى تحليلى فالتفو عليه فى مجلس ندامى وراح فى زيارة له للخرطوم وسالوه بانو زولتك دى يعنى يافلان مابتستحق الغنا ده كلو..يعنى عادية أها لمن ضايقو شديد فى أنو يدى القصيدة حقها فى البعد الحسى والمعاين اعياه التفسير فلم يجد سوى عباره وحيده يشرح بها الأمر كله ...قيل انه اتكى على يده وهو ينظر للكاس.. وقال (والله ياجماعة ده شيتن غمييييس)

معنا هنا أخوة بارعين فى الترجمة ولكننى شخصياً لو سئلت هذا السؤال سيكون ردى للخواجات بالترجمة المناسبة..(والله ده شيتن غميس)

--

هل يمكن أن يترجم أحدهم هذه العبارة Wink
Very Happy Very Happy
انتقل الى الاعلى
استعرض نبذة عن المستخدمين ارسل رسالة خاصة
محمد جمال الدين



اشترك في: 09 مايو 2005
مشاركات: 1838

نشرةارسل: الاربعاء اغسطس 10, 2011 12:30 am    موضوع الرسالة: رد مع اشارة الى الموضوع

العزيز عيسى

سلام وكل عام وانت بخير

طبعآ الأمر ربما أحتاج منا بعض التفكير!.

بلغ تحياتي للفنان العزيز أبو الحسن كما أخيه الجميل عبد الله.

ولك منى أسمى التحايا

محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الاربعاء اغسطس 10, 2011 12:36 am    موضوع الرسالة: رد مع اشارة الى الموضوع


العزيز حاتم الياس

ألف مرحبآ بك في عوالم بحثنا عن "فخرنا" الوطني!.

ونحن معك في إنتظار من يترجم لنا تلك العبارة ، التي قلت بها : "(والله ياجماعة ده شيتن غمييييس)؟.

ودي

محمد جمال



انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الاربعاء اغسطس 10, 2011 1:09 am    موضوع الرسالة: رد مع اشارة الى الموضوع

الجماهير ؟.



هل يكون فخرنا هو "نحن"؟.......... الشعب؟. (((الشعب الذي يفعل كل يوم المعجزات في مواجهة المأساة))). = الناس العادية = القيم الجميلة والنبيلة؟. دا رأيي أنا!.

بس دي نقول بيها كيف؟. (حكاية السؤال بتاعة "نحن" منو دي قصة ساهلة)!.

طبعآ لازم نفتش رمز من شاكلة "ملحمة شعرية" أو "حجوة شعبية" أو أغنية تمجد القيم دي؟. يعني لازم نتصرف.

وإلا حا نبقى زي الكنديين ما عندنا مصدر فخر. بس عيب علينا نحن أمة عمرها آلاف السنين مش زي كندا أصبحت أمة قبل ميتين سنة بس.

تحياتي

محمد جمال

انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
تاج السر الملك



اشترك في: 12 اغسطس 2006
مشاركات: 823
المكان: Alexandria , VA, USA

نشرةارسل: الاربعاء اغسطس 10, 2011 12:35 pm    موضوع الرسالة: رد مع اشارة الى الموضوع

محمد جمال سلام

هل من الضروري البرايد دي تكون زول؟؟؟؟
الزول البكون (برايد)، لو ناقصاه العالمية ما بجيب دخل، يعني لو جامايكي قال ( بوب مارلي)
الناس بيعرفو الزول ده قاصد منو، و ( اسحق نيوتن) و ( بيل قيتس) و ( لويس باستير) الى آخره
ما فضل غير النيل، و الظواهر الطبيعية المعروفة لناس الدنيا، و ( جون قرنق)، و الصمغ العربي.
اما زول visionary
فالله أعلم
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة انتقل الى صفحة المرسل
محمد جمال الدين



اشترك في: 09 مايو 2005
مشاركات: 1838

نشرةارسل: الاربعاء اغسطس 10, 2011 1:31 pm    موضوع الرسالة: رد مع اشارة الى الموضوع

تاج السر الملك
سلام

والله يا ملك قصتنا نحن محيرة. ما عندنا شيء متفقين عليه لا في الماضي لا في الحاضر: لا بشر لا طبيعة لا ثورة لا رؤية ... لا شيء. ولو نحن فهمنا دا الشعوب التانية ما بتفهم لينا بالساهل. يعني حكاية الزوغان من سؤال "البرايد" دا قدام جنسيات تانية ما بتنفع. مفترض نشوف لينا "برايد" مع البشر التانيين، ما عندنا طريقة!.

قصة "النيل" دي كانت حل بالنسبة لي أنا في حينها بل ولقي إستحسان الجموع وردده الناس بشهية من بعدي:
Oh The Nile!

بس برضو في مشكلة في حتة "النايل" دي. النيل هو فخر لأهله فقط إن جاز الفخر به كهبة من الطبيعة وهو أن النيل لا يوجد في ذاكرة كثير من شعوب السودان في الشرق والغرب فهو لا يعني شيء بالنسبة لأهل دارفور وكردفان كما هو لا شيء بالنسبة للبجا في شرق السودان، إضافة إلى أنه هو فخر المصريين من قبلنا ويقولون منذ الأزل أن مصر هبة النيل. ومحتكرين ليك "النايل" دا خالص وكأنه ملك يمين الفرعون.

وأتفق معاك ما عندنا "شخص" لا في الحاضر لا في الماضي متفقين عليه ودا احد اهم تجليات أزمتنا كأمة شكلتها الأزمات. فمثلآ (محمد أحمد المهدي وخليفته) عند الكثيرين كانوا سببآ في مجازر لبني جلدتهم المك نمر قالوا جرى الطيب صالح عروبي فرح ود تكتوك "قصتو ما واضحة" الأزهري فرط في الديمقراطية وودانا لجامعة الدول العربية فأصبحنا ذيل العرب بدلآ من رأس الأفارقة (أو كما يقال) وهلمجرا. ثورة أكتوبر لم تعد ثورة لأن بعدها جاءت عدة ثورات من شاكلة ثورة مايو وثورة الإنقاذ أي زول شابي قاطع ليه ثورة من راسو.

مرات بفكر في شخصية إسطورية ممكن نلقاها في الحكاوي والأحاجي الشعبية شخصية خيالية مجنحة شخصية بطولية زي "روبن هود أو زورو" يمكن أن يقبلها الجميع فتكون محل إجماعنا أمام شعوب الأرض.

هل لازم إكون عندنا "فخر"؟. بالنسبة لينا نحن عارفين البير وغطاها بس مين البيقنع الديك : ).

((هل نحن في الحقيقة عارفين البير وغطاها؟.))).

تحياتي

محمد جمال






انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
الوليد يوسف



اشترك في: 10 مايو 2005
مشاركات: 1848
المكان: برلين المانيا

نشرةارسل: الاربعاء اغسطس 10, 2011 1:50 pm    موضوع الرسالة: رد مع اشارة الى الموضوع

البشير وأوكامبو, لبني أحمد حسين, دارفور, إنفصال جنوب السودان,المجاعات,الشريعة,ختان الإناث......هو إنحنا أدونا فرصة عشان نفتخر؟؟ Crying or Very sad
_________________
السايقه واصله
انتقل الى الاعلى
استعرض نبذة عن المستخدمين ارسل رسالة خاصة
محمد جمال الدين



اشترك في: 09 مايو 2005
مشاركات: 1838

نشرةارسل: الاربعاء اغسطس 10, 2011 2:39 pm    موضوع الرسالة: رد مع اشارة الى الموضوع

العزيز وليد يوسف

مرحبآ بك هنا

ما عددته من كوارث معظمها حدث بعد العام 1983 وحتى اليوم "نظام الجبهة الإسلامية" بس نحن كنا وين من العام 1503 "نشوء سنار" وحتى الآن؟. ليه ما عندنا "رمز" مجمع عليه طوال هذه القرون؟.

أم عندنا؟.

أظن أن هناك مشكلة تتبدى أكثر عمقآ مما أعتقدنا أول مرة أمام هذا السؤال الذي يبدو بسيطآ على غير حقيقته!. عند هذا السؤال "البرايد" تتبدأ الأزمة كلها مهولة في عريها أمام أعيننا وأعين التاريخ.

تحياتي

محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
أبو بكر صالح



اشترك في: 28 يوليو 2008
مشاركات: 236

نشرةارسل: الاربعاء اغسطس 10, 2011 3:15 pm    موضوع الرسالة: رد مع اشارة الى الموضوع


هييييع نحنا أحفاد البصيرة أم حمد منو الزينا؟.





------
رايك شنو يا ابو حميد


_________________
أرض الله ما كبْوتة
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الاربعاء اغسطس 10, 2011 4:02 pm    موضوع الرسالة: رد مع اشارة الى الموضوع

أبو بكر صالح

سعيد بطلتك في دنيا بحثنا عن "برايدنا" الضائع وربما "بردايسنا".

والله يا أبو بكر أنا ما عندي مانع تكون "البصيرة أم حمد" : )

بس نحن نتفق. ... البصيرة أم حمد تتقدم الجموع الهادرة اعنى الرموز... : )))

مقترحك القيم يوضع في سحارة المقترحات : )

تحياتي

محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
الوليد يوسف



اشترك في: 10 مايو 2005
مشاركات: 1848
المكان: برلين المانيا

نشرةارسل: الاربعاء اغسطس 10, 2011 4:59 pm    موضوع الرسالة: رد مع اشارة الى الموضوع

العزيز محمد جمال الدين...سلام

ما قلنا نجيب الحاجات المشهورين بيها "العالمية" علي قول (تاج السر الملك)،لكن ما مشكلة هسي اتذكرت "زول" وناس كتار نفتخر بيهم منهم علي سبيل المثال لا الحصر، أبطال العاب القوي السودانين ( ابو بكر كاكي ) بطل مسافة الـ 800 متر واصغر لاعب في العالم يفوز بذهبية هذه المسافة داخل الصالات المغلقة 2008 حيث لم يتجاوز عمره آنذاك الـ (18) عاماً ومن سبقوه في هذا المضمار مثل "موسي مدني" و"خليفة عمر" و"موسي احمد جودة" و"جون نرت" وعارضة الأزياء السودانية سابقاً والجنوبية حالياً " اليك ويك" وبطل التايكوندو السوداني "هاشم بدر الدين" والمرحوم "منوت" لاعب كرة السلة و الموسيقي العالمي"حمزة علاء الدين".....وهلمفخرا.

وليد يوسف

_________________
السايقه واصله
انتقل الى الاعلى
استعرض نبذة عن المستخدمين ارسل رسالة خاصة
محمد جمال الدين



اشترك في: 09 مايو 2005
مشاركات: 1838

نشرةارسل: الاربعاء اغسطس 10, 2011 5:30 pm    موضوع الرسالة: رد مع اشارة الى الموضوع

روعة يا وليد

ولا يسعني إلا أن أحي الأسماء "البرايدية" الجديدة المقترحة مع إنني أخشى أن يكون هناك عدة مشاكل في الحتة دي. يعني مثلآ أين الركورد بتاع كاكي من هيلاسي لاسي الإثيوبي وجونسون الأمريكي وهم لسه ما لحقو يبقو رموز فخر في بلدانهم؟. (مع وافر التقدير للشاب المجتهد كاكي).

ومشكور على الإجتهاد فلك أجر المحاولة إن لم تصب!.

نحن مشكلتنا شكلها أعوص بعدة فراسخ مما تخيلناه في البدء من "عواصة".

تحياتي

محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
الوليد يوسف



اشترك في: 10 مايو 2005
مشاركات: 1848
المكان: برلين المانيا

نشرةارسل: الخميس اغسطس 11, 2011 1:31 pm    موضوع الرسالة: رد مع اشارة الى الموضوع

اقتباس:
يعني مثلآ أين الركورد بتاع كاكي من هيلاسي لاسي الإثيوبي وجونسون الأمريكي وهم لسه ما لحقو يبقو رموز فخر في بلدانهم؟. (مع وافر التقدير للشاب المجتهد كاكي).


ماهي مجتهد دي بالتحديد مصدر الفخر والمفخرة؟؟،ماعارف انت قاصد شنو بالضبط لمن قمت بمقارنة انجاز الشاب المجتهد (كاكي) بانجازات العداء الاثيوبي "غبراسلاسي" والعداء الأمريكي "مايكل جونسون"؟؟أتخايل لي ما تبحث عنه هنا وسميته "بالفخر" هو "الإعتراف" الدولي او أعتراف الآخر بما تنجز وتساهم به في التراث الأنساني زي ما قال ليك (تاج السر الملك ) العالمية تاني وفيما أظن أن العداء المجتهد (كاكي) وصحبه الكرام المذكورين عاليه قد قاموا بهذا الشئ الحد الأدني من الإعتراف في المحافل الدولية مثلما قام به كل من (غبراسلاسي) و(مايكل جونسون)، فرفع لهم علم السودان فوق السارية خارج حدود السودان الأقليمية وعزفت لهم موسيقي "السلام" الجمهوري، لحن نحن جند الله أثناء مراسم تقليدهم الميداليات الذهبية الجابهو بي عرق جبينهم فلهم حق أن يفتخروا بما أنجزوا ومن واجبنا عليهم كمواطنين نشاركهم في ورطة المواطنة والتأريخ والمصير المشترك، أن نفتخر بهم بمعزل عن اي مقارنة مع أنجاز آخر، فالأنجاز يظل أنجازاً، خاصة أن جاء في واحدة من الألعاب الفردية مثل رياضة العاب القوي ،مثله في ذلك تماماً، مثل بوب مارلي و أوزيان بولد ونيلسون مانديلا وزين الدين زيدان ومايكل جاكسون وكارل ماركس في حين أنا لو نظرنا لنموذج "نيلسون مانديلا" مثلاً بعين فاحصة، رغم ما قدمه من صمود وتضحية وثبات علي المبدأ، يظل نموذج يتميز "برمزيته" العالية، فالتأريخ يشهد أن معظم الشعب او الشعوب الجنوب أفريقية المناهضة لنظام التفرقة العنصرية "الأبارتايد" وكل اشكال الأستعمار والإحتلال كانوا قد قدموا مساهماتهم الفعالة والبطوليه في أسقاط وتغيير هذا النظام،يعني أنت عايز ترفع راسك فوق لمن تسأل عن "البرايد" تبع وطنك وفي نفس الوقت داير تختار ياتوا نوع من البرايد بدل ما تمد كرعينك قدر لحافك وتترك مبدأ المقارنة غير المجدي الماحيوصلك لي شئ من المفخرة طالما عينك علي مفاخر الآخرين!!!، ممكن يكون عندك مصادر فخر كتيرة، لكن مركزية التأريخ هي الما راضية تديها الأعتراف البتفتش عليه في الإتجاه الخاطئ لمن تنسئل .

مودتي

وليد يوسف

_________________
السايقه واصله
انتقل الى الاعلى
استعرض نبذة عن المستخدمين ارسل رسالة خاصة
الوليد يوسف



اشترك في: 10 مايو 2005
مشاركات: 1848
المكان: برلين المانيا

نشرةارسل: الخميس اغسطس 11, 2011 1:51 pm    موضوع الرسالة: رد مع اشارة الى الموضوع




المصدر
ــــــــ
الموسوعة الحرة ويكيبيديا
_________________
السايقه واصله
انتقل الى الاعلى
استعرض نبذة عن المستخدمين ارسل رسالة خاصة
محمد جمال الدين



اشترك في: 09 مايو 2005
مشاركات: 1838

نشرةارسل: الخميس اغسطس 11, 2011 2:24 pm    موضوع الرسالة: رد مع اشارة الى الموضوع

طبعآ يا وليد نستطيع أن نفخر بكاكي ولو أن كاكي لم يكمل مشواره بعد... فربما أستطاع بالفعل أن يكون رمزآ عالميآ في مجال الرياضة "العدو". أتمنى له مزيدآ من النجاح.

الأسئلة حول "البرايد" في صيغة جديدة مع تركيز على الفترة الزمنية القائمة بين عامي 1504 - 2011 م:

1- وين رموز وأفعال وثورات وأمراء وملوك سنار ودارفور والمسبعات والمهدية؟.

2- وين الشيوخ والعلماء والفقهاء العظام الذين حفل بأفعلاهم وعظمتهم كتاب الطبقات لود ضيف الله ومنهم من كان يطير بلا أجنحة ومنهم من كان يمشى على ظهر البحر ومنهم من كان يحي الموتى إلخ؟.

3- وين المعارك التاريخية من قبيل أربجي وشيكان والخرطوم وكرري؟.

4- وين المكوك القبليين الأشداء؟. هل من روبن هود؟.

5- وين الثورات: أكتوبر "الثورى الكبرى" ونوفمبر "عبود" ومايو "نميري" وأبريل "الإنتفاضة" ويونيو "الإنقاذ الوطني"؟.

6- وين الثوار والفنانين والشعراء والكتاب والعلماء والفقهاء في العصر الحديث؟.

7- وين ناس المنابر الإسفيرية؟. : )

كل تلك الصيحات والجهود والعرق والأحلام والدماء والشهداء والعالم لم يتعرف على حي أو شيء منا!.... "؟"... أم أنهم "يتغاتتوت" علينا "؟". لماذا؟.

تحياتي

محمد جمال

انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الخميس اغسطس 11, 2011 2:52 pm    موضوع الرسالة: رد مع اشارة الى الموضوع

ود ضحوية هو روبن هود السودان والإنسانية جمعاء!

عندي تصور لو أن ستة من الروائيين السودانيين في الخمسين عامآ الماضية تناولوا قصص ود ضحوية وتتبعوا أثره وأعماله باهرة الدهشة لأصبح ود ضحوية روبن هود العصر الحديث ولكنا أجمعنا عليه في السودان دون غيره كونه مثل روبن هود الإنجليز خارجآ على القانون ونحن جميعنا نكره القانون كون القانون عندنا يصنع خصيصآ لردع الناس البسطاء في سبيل أن تكون السلطة والمال دولة الأغنياء. لكن لم يفعل السابقون منا. لم يستطعو أن يجعلو من ود ضحوية رمزآ باقيآ عبر القرون وملهمآ للشعوب ولم يصبحوا همو رموزآ ولا شيء. فهل نفعل نحن؟. أعني الأجيال الحديثة.

ويا للبؤس: البعض يدين ود ضحوية ويعتبره مجرد همباتي!.

تحياتي

محمد جمال ع. حركة "باحثون عن برايدهم (فخرهم) الوطني الضائع"

انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الخميس اغسطس 11, 2011 4:23 pm    موضوع الرسالة: رد مع اشارة الى الموضوع

طبقات ود ضيف الله معجزات تفوق الخيال

عندي تصور آخر يصب في ذات إتجاه تصوري لما يمكن أن يكونه ود ضحوية في تراثنا الشعبي وفي أدبنا المكتوب والذي سنكتب فهناك بالإضافة إلى ود ضحوية المئات من الشخصيات الحقيقية والإسطورية التي جاء لنا بها ود ضيف الله في كتابه "الطبقات" . معظم شخصات ود ضيف إسطورية كل واحدة منها تصلح لأن تكون روبن هود أو زورو أو زوربا أو آلهة الأغريق والرومان تلك التي قال هيمروس أنها تجتمع في جبل البركل في السودان.

من كتاب الطبقات وحده نستطيع أن نستلهم ألف رواية بطولية صاخبة تستطيع أن تدهش العالم و ألف قصيدة ملحمية وألف فلم سينمائي وألف مسلسل تلفزيوني وألف إسطورة. لا أعتقد أن هناك كتابآ في العالم أجمع أثار المعجزات بقدر كتاب ود ضيف!.

ماذا فعلنا به حتى الآن؟:
كلما فعلناه به لا يتعدى أن جعلناه عرضة لسطوة السلفيين وبعض المتصوفة يتحاجون حول خوارقه بين مكذب ومصدق في حضرة عوز خيالهم ... وهو "الكتاب" أدب من الإجتماع وعلم النفس والسياسة والآنثربولوجيا والأساطير والمعجزات الخارقة... لم يخلق لضيق الأفق!.

تحياتي

محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الخميس اغسطس 11, 2011 9:17 pm    موضوع الرسالة: رد مع اشارة الى الموضوع

هل نحتفي بود ضيف الله صاحب الطبقات... " يا لعظمته"

ونحن حتى الآن "هذه اللحظة" نتحدث عن سوء توثيقنا!. ولم نقتف أثر ود ضيف الله!.

لماذا لا يوجد مركز فكري أو ثقافي أو رياضي "واحد" يحمل إسمه؟. (هل هناك؟. أنا لا أعلم كل شيء).

هو أول من وثق لنا كما نعي ذواتنا!.

هو أعظمنا شأنآ... بلا منازع... لترو كيف "نحن" نكره ذواتنا الحقة!.

(((الصورة البشعة "الوقائع" التي صورها ود ضيف الله تلك كانت صورتنا التي نحاول الهروب منها... تاريخنا الحقيقي... لماذا نهرب من التاريخ؟.))). الإجابة بسيطة لأننا فاشلون في الحاضر!. (((حا إجي واحد إقول نحن "منو؟" عشان إحاول عبثآ إطلع نفسو من "ال "نحن" الحاضرة)).

ذاك هو شعوري الخاص.

محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الخميس اغسطس 11, 2011 9:48 pm    موضوع الرسالة: رد مع اشارة الى الموضوع

نحن الأجيال الجديدة "لن نسمع لأحد"!

1- حكومتنا تسطو على السلطة "المال والأرض والعرض" بقوة بعض المسدسات روسية الصنع أو أمريكيتها ويودون إيهامنا بأنهم من مكة!.

2- معارضتنا "المزعومة" من الأحزاب التقليدية يسعون إلى إيهامنا بأنهم معارضة.. برضو من مكة!.

3- مثقفونا المزعومون "العجزى" يزورون ثقافتنا لمصلحة عجزهم.

و

4- عديد من الأجيال الجديدة يقتفون اثر الماضي وبؤسه. الماضي الذي تمثله رسميآ في الوقت الراهن ثقافة الإخوان المسلمين (المصرية) في السودان على مستوى السلطة السياسية .. لا بل على كل المستويات!. يا لبؤسنا وفي مصر العظيمة هذه الأيام ثورة قدمت الدماء كماء لغسيل تلك الجراح التاريخية والنرجسية . يا لبؤسنا في سودان مصر كيزاننا!.

يا لبؤسنا المطلق. يا لهواننا!. (نحن)... نحن رعاع!.


محمد جمال

---------------------
معليش على المشاعر الفائضة فهي حقة!. أنا حزين!.

انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
مبر محمود



اشترك في: 01 ابريل 2011
مشاركات: 131

نشرةارسل: الجمعة اغسطس 12, 2011 1:36 pm    موضوع الرسالة: رد مع اشارة الى الموضوع

بعد السلام والذي منو يامحمّد .. دعني أهبك تساؤلاً آخر، قد يعينك- أو ربما لا- في معتركات حيرتك التي أتمنى لها من كل قلبي أن لا تنتهي- فالحيرة جنّة والمحتارين لفي نعيم(؟)
تساؤلي هو: لِمّ الفخر بالأساس؟ من أين أتى؟ ما هي مدلولاته؟ وهل فعلاً البني أدم يحتاج إليه؟
وأنا طبعاً أتسائل هكذا لأنه وللأمانة يملؤني التوجس وعدم الإرتياح حيال هذه الخصلة ومنذ زمن.. تجدني بلا إراديتي نافراً من المفتخرين، معهم يصعقني الإحساس بأنهم أناس غير حقيقيين يتحركون داخل مركّب نقص عريض.
فهل تراني على حق.؟

ثمّ ألا تعتقد معي إن مقولة (العارف عزّو مستريح) يمكن لها بوجهةٍ من وجوهها أن تفسّر موقف "الجماهير السودانية" من هذه الخِصلة؟
انتقل الى الاعلى
استعرض نبذة عن المستخدمين ارسل رسالة خاصة
محمد جمال الدين



اشترك في: 09 مايو 2005
مشاركات: 1838

نشرةارسل: السبت اغسطس 13, 2011 1:41 am    موضوع الرسالة: رد مع اشارة الى الموضوع

وبعد التحية والأشواق يا مبر ... حا أجيك في وقت لاحق برواقة.

بس : (العارف عزّو مستريح) دي محطة مهمة و ربما "مريحة"!.

اللحظة دي مشغول شوية... قليلآ وأعود.

قصدي حبيت أحي حضورك هنا ليس إلا.

محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
محمد جمال الدين



اشترك في: 09 مايو 2005
مشاركات: 1838

نشرةارسل: الاحد اغسطس 14, 2011 5:17 pm    موضوع الرسالة: رد مع اشارة الى الموضوع

عود إلى كلام مبر وقد أشعرني (ولا أدري صحة شعوري) بقدر من "القدرية"!.
وهو أمر مفهوم في حالتنا. حالة الحيرة الأزلية. نحن (كثير من السودانيين) نفهم أننا غير متفقين على اي رمز وطني ولا شيء.

كما أن مثل هذا السؤال عند كثير منا ربما كان شيئآ من قبيل الترف "؟".
بالزبط كما أوحى مبر.

غير أن هذا السؤال عند الأخرين من الأمم شيء بدهي يسألونه كلما حانت الفرصة (تلك الأمم التي خلقها الله لتتعارف) ... يسألوننا من باب التعارف... ماذا نفعل معهم؟.

السؤال عملي جدآ... والسائل بريء جدآ. ماذا نقول له؟. مع العلم أن السائل لا يتوقع إجابات فلسفية ولا نظرية وإنما حاجة بسيطة عملية من قبيل "النيل" أو الصحراء أو المك نمر أو فريق الهلال وهكذا بساطة!.

بس كلام مبر برضو مهم جدآ... يذكرني ما قالته المرأة الكندية أن لا فخر لهم في كندا... ولو أن الكندية لم تقل أن السؤال غير ذي جدوى كما أنها أيضآ لم تقل أن "الفخر" غير مهم. لا بل هو مهم لديها لكن قالت :ليس لديهم في كندا اي رمز للفخر!. هل نقول نحن مثلها؟. هل نتفق على ذلك؟. هل نقبل؟.

تلك هي القضية.

وعندي إعتقاد قلت به في السابق أن عند هذا السؤال فخ جسيم يسلم رقابنا للأزمة التاريخية بكل دسامتها وربما كان ذاك هو مكمن حيرتنا وسر هروبنا!.


محمد جمال
انتقل الى الاعلى
استعرض نبذة عن المستخدمين ارسل رسالة خاصة ارسل الرسالة
استعرض مواضيع سابقة:   
انشر موضوع جديد   رد على موضوع    sudan-forall.org قائمة المنتديات -> منبر الحوار الديمقراطي جميع الاوقات تستعمل نظام GMT
انتقل الى صفحة 1, 2  التالي
صفحة 1 من 2

 
انتقل الى:  
لاتستطيع وضع مواضيع جديدة في هذا المنتدى
لاتستطيع الرد على المواضيع في هذا المنتدى
لا تستطيع تعديل مواضيعك في هذا المنتدى
لاتستطيع الغاء مواضيعك في هذا المنتدى
لاتستطيع التصويت في هذا المنتدى

قوانيــــــن منبر الحوار الديمقراطي

 

الآراء المنشورة بالموقع لا تعبر بالضرورة عن رأي الجمعية السودانية للدراسات والبحوث في الآداب والفنون والعلوم الإنسانية


  Sudan For All  2005 
©
كل الحقوق محفوظة