الحب في اميريكا

[تاج السر الملك]

• الحب في اميريكا

حدثني (عزو) فقال:
تعرف يا تاجو، سمعت تحت تحت، انك لو عايز تجكس في امريكا، تسعي ليك كلب، اها الجكس طوالي قالو يجوك طايرات ... اوووو كيوت، اسمو منو عمرو كم، والحنك يِنقرِش، والتلفونات تبودلت، انا معرفتي بالكلاب دي غير كلب مركوب العرب التفته داك، ومعاه شجر النيم في السودان، حاجتين في اي حتة بتلقاهم، ماعندي تاني عرفة، وغير حيمورة يقرب مني، بفكو في قدومو لمن يعرف حاجة، وبعرف كمان الحنة في البيوت، بزرعوها عشان يعملو منها سيطان فيجيتيريان، يدقو بيها الشفع، ماعلينا المهم، مشيت اشتري لي دوقي، لقيتم اشكال والوان والاسعار نار، اخويا لينا افروميريكان قالي تشتري كلب؟ يا زول القرش ما بجي بالساهل، باقي هم في الملح ده، كان يختفو ختف (عند الشرطة يسمي هذا السلوك سرقه)، مابقعدو ساي، قالي امشي الشلتر، كلاب ضاله حلاة الدنيا عليها، ومشيت في ليل من الغربة، يا قول البليبلات، كلامو الرجل الجاكسوني طلع صح، لقيت القفاصة ملانة، هوهو وسيك سيك، الاكل والشراب والكندشة، واحدين كده بشبهو لي ناس عديل لاقيتم، تميت المعامله، طبقت الجرو بعد توقيعات وحلفان، وقالو لي الله مرقك الاكسنت بتاعك ماتقيل، الكلاب دي ما بتحب الناس بتاعين ازواظ ونو طايم فوريو، شفت كيف، لفحت معاي شوال ردة عشان حكايه التبول دي، واطعمة من البقاله، واحدات ماركة الكديسه، وساردين للكلاب (ضقتو لقيتو احسن من حقنا)، مشينا عيادة البيطار حجزنا ليه لكشف الاسنان، وقالو لي البروستاتا لسة بدري عليها، قلت ليهم لا بس للضمان كده.
ريحنا في البيت، وحصل التآلف والتعارف والمودة، يا قول الكاشف، اهايا بوبي، قم بنا يا صاح حي الربيع حديقة الارواح، الواطا عصرت والحروم بكونن في النزهة، البودول الانيق هز ضنيبو، ومرقنا وشلنا عصينا، على الحرية منو بوصينا.
مشينا دغري علي " جنينة النزهة" لفة لفتين قعدنا في كنبه، جا ماري فينا واحد من بتاعين العجلات ديك، خبت فرامل مدهشة، كيوت دوقي قال بابتسامة، شكرا ياحبه، سعيك مشكور، فحط خلاص، زولك تكل وداير ياخد ويدي، قال شبهو على كلبو الضايع، قلت لي ده جا معاي من افريكا؟ قالي ريلي؟؟ عندكم بودولات انتو كمان؟ قلت لي عندنا قراي هاوند احمر برضو، يا معلم الدوقي ده كلفنا كتير، والواطا مغربت، امشي اخد ليك دش وارتاح الله يديك العافيه، تلقاك ما محتاج لكلب زاتو، الزول كسح بعد ما سل روحي، يلا يا جوني نغير الحته، اها حمنا كده، والضلام بدا يزيد، لاقتنا مرا غليده كده، قالت لي ارخي حبلك ده من الكلب، يرخي شترك، خنقتو فطستو.. عاينت، لقيت جوني بقابض في الهوا مقابضة، رخيت الحبل، سمع اضاني قالي في ميزان حسناتك، قلت لي ياود انت بودول كوز ولا شنو؟
تاني يوم النافورة راس، شوية وجا زول خت لي قروش في يدي، ده شنو ده، فهمت، شحاد انا يا نجس، ولو فرضنا شحاد، دولار واحد يا اهبل؟ نهاية اليوم عملت زي قريب خمسين دولار، الأمريكان لمن يقومو على المروة، جدعان والله.
المهم، درب النضال اصلا صعيب، شويه كده وجات شله من غادات حسان، خمسة مرة واحدة، بلوندات اصليات، بديت الز في الكلب لقدام، قوم قوم تقوم قيامتك، زولك بدا ينبح "هو هو" يناوش في كلاب البنات، اخيراً ..... اووووووو، صدحت الاصوات، كيووووت... كووجي كووجي كوووجي، والحنك دور، خمسة بدل واحده، قدامي وخشمي مضرب بينق بونق، اااي نو، راااايت، ريلي، ضربت انقليزي تسالي في خشم ككو، والكلب مع الكلبات بهناك، شغال نظام داس مشاعرنا وحصل، واليونيفيرس قد ابرة، يا رجل الحنك الرباعي عايز دفع رباعي، فما بالك بالخماسي والسلم الخماسي، انعل ابو التم تم، ولا تلفون ما حصلت، الجماعة مشو وجرحو مشاعري الطفلة.
الصباح جاني ياسر، قالي البودول شنو؟ قلت لي شرك للجكس القوقازي، قالي وبي بودول؟ النوع ده ما بجيب جكس، بجيب الهوا، اهاا عشان كده بتاع العجلة وقف، عرفتَ، من دربي ده اجيب دوبرمان، قالي لا يازول داك للحرامية، جيب المنقرط داك الدالميشن، كسحت للشلتر، ضحكو وقالو قرررر، قالو لي كمان بقيت تعزل يا مهاميد، ما في دالميشن، عجبك الجيرمان شبرد داك شيلو، بصيت ناحيتو يا قول عادل امام، حاجة جهامة كده، ده حياكل القدامو ووراه، وشكلو كده بتاع لحم ما حلال، ويكون بضرب السجارة من عيونو الحمر ديل، لا يفتح الله، وتحت تحت قالو بحب رفقة الحروم السناقل، ومن فئة الرجال البواليس، بس، يا جماعة الشتا دخل خلاص، شوفو لينا كلب نجكس بي، قبال الشمس ما تبقى بطارية، والشجر بدا يحت في الصفق، وطوالي في بالي، واحد زول كده شين ده زي العبلانج، حايم بكلبو النهار كلو، كل خطوتين مفنوس يضاحك في جكسوية، ويلقط في النمر، سانك يو.. ليتر.. شد حيلك يا بوص، ياقول وكيل عريف التجاني مدرعات الشجرة.
في النهاية لمن فترو من حجتي، الناس ديل قالو لي اصبر اسبوعين تلاتة، بتجي شحنة جديدة، بتلقى "غردك"، مرقت واسفي في عيوني، يا قول حمد، تلاتة اسابيع، و يجي الثانكس قيفينق، والكريسماس، والحريم في الموسم الزي ده، اختاهن، جنهم هدايا بكونو، واكل برة، ودايرة ارحل لشقة جدية، عتالة عفش في الصقطيبة دي، والعجيبة كمبيوتري طاقي فايروس تعال صلحو، ولستك عربيتي نازل ............
يا زول هوي بلا كلب بلا سهر عيونك ليل طويلة اهاتو، يا قول ابو اللمين، يا حبة انا كلبي الواطس ده بس(

[Ahmed Sid Ahmed]

تاج حكى/ كتب:


" في النهاية لمن فترو من حجتي، الناس ديل قالو لي اصبر اسبوعين تلاتة، بتجي شحنة جديدة، بتلقى "غردك"،

نحن يا تاج ما فترنا من قصصك، وما بنصبر كتير، أها الشحنة الجديدة تجينا متين.؟

[تاج السر الملك]

سلامات يا احمد البديع
الشحنة الجاية كتاب عديل سميتو (الهلوسة) سيصدر في هذا الشهر المبارك وهو الشقيق الاصغر
لأخويه الاحمسة والدغمسة.
تحياتي من بلاد الرافضين.

[حسن موسى]

سلام يا تاج الكتابة
و الله مكتوبك يتكشـّف عن مكيدة أدبية فريدة في نوعها كونه ينجح في تصعيد الونسة الحضرية لمقام نوع بلاغي غير مسبوق يحسدك عليه بعض الحكواتية المحنكين [ الطيب صالح و ابراهيم اسحق] الذين لامسوه ملامسة خفيفة، في تعبير أهل الأرياف ، لكنهم اكتفوا منه برشفات عجولات بينما أنت توهطت في قعدتك و كمان استبديت عديل و لا جناح و لا حزن و عين الله ترعاك.

[تاج السر الملك]

شكرا لك أستاذنا حسن موسى على ترفيع النص إلى مقامات صالح واسحق
وحقيقة فإنني وباللغة الالكترونية المعاصرة اقول (أأي لايك) إبراهيم إسحق و (فولوار) له اكثر من غيره
فقدرته على الحكي التشكيلي تتفوق علي معاصريه من الكتاب السودانيين ويشمل هذا الراي الشخصي الطيب صالح، ولكنه مثله مثل غيره
من ادباء السودان لم يقع في مجال شوف "رجاء النقاش" أو غيره
وبهذه المناسبة فان كتاب الهلوسة، يعتمد تماما على الونسة الحضرية .. والتي هي عماد المعرفية السودانية
وهي لغة تقع في مجال التشكيل النصي دون شك، ولها قدرة على وسم المعاني بمياسمها بدقة الليزر.

[محمد عثمان أبو الريش]

يا سلام على السرد الممتع.. شكرا يا التاج العمة القبعة. اى حاجة في الراس انت.

وفى إنظار الهلوسة.. أصلو السودانيين ديل مما جو أمريكا ما سكتوا من الهلوسـة والحين يجدونها
موثقـة ومبوبـة.. أنا طبعا نضمى ناس حسن موسى واحمد سيد احمد دا ما منو.. زى ما عارف ما عندى
أدب، أو لدى الدقـة قليل أدب.. لكن اعرف النوع الجيد (يا ساتر).. وبالفطرة لا استسيغ اى عبارة
غير متماهيـة مع.. شنو كدا ما عارف..

تلفوني عندك وسأبشر صلاح لو ما اولريدى عارف

[تاج السر الملك]

تحياتنا يا ابو الريش
القبعة والعمامة يا قول صنع الله ابراهيم.. من أجمل ما قرأت
لن يطول إنتظارنا للهلوسة فهي منا وفينا، ودونك دكتور صلاح إسماعيل وهلوسته التي حطت برحلها
في ديترويت .. قررربت اهلوس معاه، ولسة برضو ما معروف امشي اسعي لي بيت جنب
متحف (موتاون)...
لك التحية ولصلاح

[محمد عثمان أبو الريش]

تاج السر
طوالى يا عمك.. صلاح دا اى ملف يلف تلف وراه يا معلم.. وبرضو عمك قدورة عندكم في الكساندرية
مشى ديترويت.. الظاهر دا موسم الهجرة الى الشمال.
أنا زاتى قاعد اسن في الكرويدة بتاعى.. وما تستغرب لو شفتنى ضارب النايني فايف نورث.

[تاج السر الملك]

بلدا طشو منها اهلها ما بنخسر (كريدة) فيها