قصيدة العوض مصطفى العوض/ ماساة النيل السودان/القرية

Forum Démocratique
- Democratic Forum
أضف رد جديد
الفاضل البشير
مشاركات: 435
اشترك في: الاثنين مايو 09, 2005 7:56 pm

قصيدة العوض مصطفى العوض/ ماساة النيل السودان/القرية

مشاركة بواسطة الفاضل البشير »

قصيدة العوض مصطفى العوض/مأساة النيل السودان القرية


الحيْ للموت
الموت الكان يا خَيْ بيتاوقْ
راجي البَحَرْ التّسّبْ يحكي القصّة
ْالبحر القانِصْ لي الأطفال زيْ هادِي القنْصةْ
زيْ زول (الكار)
إتّفّنْ في الواطَةْ وخمّاهنْ
خلّى حلوقنا حناضِل وغُصّة
ْالنّوّارة الشاّلتْ وحتّتْ..قَبُلْ ما يضرُب جرس الحِصّةْ
اترصّوا ليك يا دِيكْ الرّصّةْ
جُوّه المركبْ
مُركبْ صاج..والصّاج زي قشّةْ
جُوّه الموج والعِرق ابْ وشّةْ
يا كمْ بيت في الدّنيا اتقشّ
قصب الجدول نيْ قُبّال ما يلوي اتحشّ
الحزن الفاض عمّ الحيشان لامتين يتفشّ
كعب الغُلُبْ الما بْيِتْباقصْ
وُشينة الدّرشة الفوق الدّرْشة
أذكى النّاس فتّشْ تلقاهم،التيراب الرّاجي الرّشّةْ
عيال منصور، راجين الهَبْشةْ
جرّبناهم ممّا قُمنا، وعايشناهم حدّ الدّهْشةْ
خاويناهُم ما خذلونا..ولا قلبولنا الصّفحةْ الهشّة
ولا في يوم ورونا الإحْنَةْ
صبّارين يوم تقع المِحْنةْ
غُناهُم موقدين نيران نِحْنَ
ولمّا اختاروا يقُعْدُوا براهُمْ
شالوا الشّيلةْ ووقفوا تراهُمْ
ودفعوا التّمن الغالي..الغالي
والعين شاهْدةْ
المدرسة واحدة
ياك تموت بالجهل الكافرْ
والّلهْ تعيش في الدّنيا تدافِرْ
وما معرُوفةْ الجاياكْ باكِرْ
أمّةْ تعيش في الدّنيا مُجاهدةْ
ضِيق العيش حاكوها الفاردَةْ
يقرّبوا منّها تبعِدْ شاردَةْ
عزاي أنا ليكُمْ
وليكُم الّله
وُيوم المِحْنةْ صبرْتُوا عليها
عيني انا باردة
حسن موسى
مشاركات: 3621
اشترك في: الجمعة مايو 06, 2005 5:29 pm

و عزاؤنا

مشاركة بواسطة حسن موسى »

"عزاي أنا ليكم"
و عزاي
و عزانا كلنا
في صوت العوض
صورة العضو الرمزية
إبراهيم جعفر
مشاركات: 1948
اشترك في: الاثنين نوفمبر 20, 2006 9:34 am

مشاركة بواسطة إبراهيم جعفر »

أظنو العوض قاصد يكتب "ولاَّ تعيش في الدنيا تدافِرْ" من بعد "ياك تموت بالجهل الكافرْ" بدلاً عن "والله تعيش في الدنيا تدافر"؟ ولا انا غلطان؟

برضو أظن جملة "عيني انا باردة" الشعرية في القصيدة إيَّاها دايره ليها شغل "موسيقى-شعري" شويه يطولا حبه على نحو تنضبط بيهو نغمة موسيقاها الشعرية مع نغمة موسيقى "ضِيق العيش حاكوها الفاردَةْ/يقرّبوا منّها تبعِدْ شاردَةْ".

ذينكما مجرد ملاحظتين "نقديتين" صغيرتين بشأن القصيدة.

سلام لي العوض وليك يا الفاضل وليك يا شيخ حسن ود موسى، ثم أَيْنُكَ يا أيُّها الحَسَنُ؟ (بالعربي الفصيح كده :)...)
آخر تعديل بواسطة إبراهيم جعفر في الأحد أغسطس 26, 2018 12:51 pm، تم التعديل مرة واحدة.
الفاضل البشير
مشاركات: 435
اشترك في: الاثنين مايو 09, 2005 7:56 pm

مشاركة بواسطة الفاضل البشير »

سلام الصديق إبراهيم جعفر. الف سلام. نقلت ملاحظاتك للصديق العوض.

نعتك بالصديق اكيد كنت محقا.
الفاضل البشير
مشاركات: 435
اشترك في: الاثنين مايو 09, 2005 7:56 pm

مشاركة بواسطة الفاضل البشير »

حذف للتكرار.
الفاضل البشير
مشاركات: 435
اشترك في: الاثنين مايو 09, 2005 7:56 pm

مشاركة بواسطة الفاضل البشير »

سلام أخي الحبيب الفاضل..لك التحيات الزاكيات وللأخ الحبيب
ابراهيم جعفر ..ملاحظته في ولّا صحيحة..هذا ما قصدته ولكن كتابة
العامية صعبة شوية..كنت أعني ما ذهب إليه الأخ ابراهيم وقد
خشيت ان لا يقرأها الناس كما قصدت ولذلك كتبت والله..بخصوص الجزئية
الأخيرة هنا كلمة انا تقرأ مخفّفة وستستقيم الوزنة..لكم الشكر
على الملاحظات والاهتمام وللحسن سلامي وودي
حسن موسى
مشاركات: 3621
اشترك في: الجمعة مايو 06, 2005 5:29 pm

الشعر ما بتلمس

مشاركة بواسطة حسن موسى »

كتب ابراهيم ـ خليل الله ـ جعفر ،
[و اتحذ الله أبراهيم خليلا][ النساء]،
"أظنو العوض قاصد يكتب "ولاَّ تعيش في الدنيا تدافِرْ" من بعد "ياك تموت بالجهل الكافرْ" بدلاً عن "والله تعيش في الدنيا تدافر"؟ ولا انا غلطان؟
.."
و الله غلطان ثم غلطان,عشان الشعر لا يترجم و لا يصحّح و لا بتلمس حتى
و هذه حكاية تحتاج لشهرين سجن فصبرا.
و حتى أعود فعزائي في قراءة البصيرة الشاعرة التي لا يسطيع العوض عنها سبيلا أو يجد لها خانة في براحه الشعري الواسع.و أنا في نهاية التحليل غلطان و مذنب [و قد لا أدفن في مقابر المسلمين حتى]، لكن النصيحة دي كان لقيتها بصرفها لعباد الله و من عمل بما علم أورثه الله علم ما لم يعلم أو كما قال.
سلام يا الفاضل البشير [ شايف الإسم دا يا إبراهيم؟]
أضف رد جديد