التشكيليين ديل مشوطنيين عديل كدا

Forum Démocratique
- Democratic Forum
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

التشكيليين ديل مشوطنيين عديل كدا

مشاركة بواسطة محمد سيد أحمد »

امس وانا استمع للصديق التشكيلى العزيز د محمد عبد الرحمن بوب
باعجاب واستمتاع لفكره النير وقدرته على التعبير بلغة عميقة وبسيطة
تذكرت محمد الكاتب والناقد والمفكر
وسرحت فى استحضار مساهمات عدد من التشكليين اصحاب القدرات الكتابية
الرسم دا ما اصلو شغلهم لكن اى واحد فيهم يدهشك
الصديق على الهادى عرفته رساما وفنان مبدعا ولاحقا كشف عن موهبة عظيمة فى الشعر والكتابة النثرية بلغة باذخة

ومن الرعيل الاول كلهم ما بيتصاقو فى الكتابة
بولا كبيرهم الساحر
حسن موسى
النور احمد على
تاج السر الملك
عماد عبد الله
على الهادى
محمد عبد الرحمن
وغيرهم وهلمجرا

مقارنة مع خريجين مجالات الفنون الاخرى فى المسرح والموسيقى والسينما
اسهاماتهم كثيرة وبقيمة علمية كبيرة جدا
فقط اعتب عليهم لكسلهم فى اصدار الكتب
آخر تعديل بواسطة محمد سيد أحمد في الأحد يناير 19, 2020 6:44 am، تم التعديل مرة واحدة.
حسن موسى
مشاركات: 3621
اشترك في: الجمعة مايو 06, 2005 5:29 pm

الأرضة جرّبت الرسم

مشاركة بواسطة حسن موسى »


يا محمد سيدأحمد جرّب الرسم، قالوا بصلّح الكتابة.
حتى أعود
صورة العضو الرمزية
الوليد يوسف
مشاركات: 1854
اشترك في: الأربعاء مايو 11, 2005 12:25 am
مكان: برلين المانيا

مشاركة بواسطة الوليد يوسف »

وانا اقول يا حسن موسى جرب الموسيقى قالوا بتصلح الكتابة برضو 😉 كل الفنون متن والكتابة هامش له، اذن كل من يجيد صنعته الفنية فهو بالضرورة كاتب جيد.
السايقه واصله
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

رد

مشاركة بواسطة محمد سيد أحمد »

طيب يا حسن شكرا ع النصيحة

الكتابة بتتصلح ولكنها محتاجة لحاجة مهمة جدا وهى الاتساق والمصداقية

ف وارطتك ياحسن بتاعت شكرك لمؤسسة العويس فى حالة تكريم كمالا وذمك لنفس المؤسسة فى حالة د حيدر
بتتصلح كيف
كتابتك السمحة ما اسعفتك شفتا كيف

اصحى يا ترس
حسن موسى
مشاركات: 3621
اشترك في: الجمعة مايو 06, 2005 5:29 pm

جرّب القراية

مشاركة بواسطة حسن موسى »

سلام يا الوليد
جاء في الأثر و علموهم الرماية و السباحة و ركوب الخيل
[و في رواية :و علموهم الرسم و الموسيقى و الرقص و ركوب الخيال].
سلام يا محمد سيد أحمد
نصيحة لوجه الله: جرب القراية كمان، بتصلح الكتابة.
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

رد

مشاركة بواسطة محمد سيد أحمد »

طيب يا حسن
مرة القراية
ومرة الكتابة
شغال نصايح يا لقمان الحكيم

ورطة البتدور تسمو بخيت والما بتدورو تسمو هناى
عملت فيها شنو

اصحى يا ترس
صلاح حسن عبد الله
مشاركات: 212
اشترك في: الثلاثاء مايو 10, 2005 11:40 am

كتابات التشكيليين

مشاركة بواسطة صلاح حسن عبد الله »

سلام يا احمد سيد احمد
شايفك قرظت التشكيليين باكثر مما ليس فيهم. واخشي عليهم من فرط اعجابك بقدرتهم على الفصاحة والبيان، أن يتلبسهم الاعتقاد بانهم قد وصلوا الى ارض الميعاد. ولكن ، ومن ناحية تانية، وعشان الحكاية ما تبقى ( انحا وانتو )، فيا اخي انحنا وانتو، كلنا في الهواء سوا.
واحد من التشكيليين حديثي التخرج في كلية الفنون( 2017 على ما اعتقد) قال لي (انحنا بنسمع انو التشكيليين ديل بيكتبوا كتير جدا، لكن ما لقينا اي حاجة مكتوبة). الكلام كان مفاجىء بالنسبة لي. لكن نظرت الى واقع الحال من حولي، فوجدت بحوزتي نسخة واحدة من كتاب (مساهمات في الادب التشكيلي) وقلت قلت ليهو دي آخر نسخة عندي من الكتاب ده، وعندي معاها نسخ من اصدارات تانية عن التشكيل، لكن ما بقدر اديك اي واحدة منهم. الكلام كان قاسي، لكنو كان موضوعي جداً. لانو لو فقدت أي واحدة من النسخ دي تاني ما حالقاهو.
عبارتك الاخيرة يا احمد سيد احمد (فقط اعتب عليهم لكسلهم فى اصدار الكتب) بتفتح لينا باب نقعد بيهو الكلام، رغم انها اتبنت على ( العتاب). والعتاب ربما يكون مفيداً اكتر من التقريظ.
بنلقى انو اتحاد التشكيليين في 2003 عمل سمنار النشر والتوثيق التشكيلي للنظر في مآلات ضرورات ثوثيق( النص والصورة )في مجال التششكيل. وشارك فيه 11 من الكتاب، منهم اربعة ما كانوا تشكيليين ( د. حيدر ابراهيم، السينمائي الراحل طارق فريجون، ازهري الحاج ومالك عباس). وفي 2010 اعلن اتحاد التشكيليين عن (مشروع الكتاب التشكيلي والاحتفاء باربعة اصدارات من الاصدارات اللي صدرت باسم الاتحاد العام للفنانين التشكيليين/ كتاب عمر خيري، كتاب جحا، كتاب صلاح المر وكتاب اثر اللسانيات في النقد الفني والادبي). ومع انو عدد الاصدارات دي ما اتجاوز الاربعة اصدارات، لكن الاحتفاء بيها استمر لمدة اربعة ايام بدار الاتحاد. وكأني بالتشكيليين في ذلك الوقت( يقدلون )في شوارع الخرطوم ويقولون للناس( لقد اصدرنا اربعة كتب عن التشكيل في السودان)وبعضهم اخذ يباهي اتحاد الكتاب الذي لم يصدر عنه اي كتاب. ولكن المسالة بالنسبة لي لم تكن على هذا النحو الذي يستدعي كل هذه المباهاة بما انجز، لسبب واحد وهو انو الساحة كانت خالية من( الكتاب التشكيلي)، على العكس من المجالات التانية ( شعر، موسيقى، رواية، قصة قصيرة . . الخ) التي بها من الاصدارات مما لا قبل للنشر التشكيليي به.
المهم انو مشروع ( الكتاب التشكيلي) رغم انو خرج باتحاد التشكيليين من مهامه وحوله الى (ناشر) ودي طبعاً اصلها مهمة دور النشر وليست من مهام اتحاد التشكيليين، الا ان الغرض من المشروع لم يكن على هذا النحو من القفز على المهام، بل الغرض من المشروع كان هو تحفيز وتحريض الكتاب التشكيليين لمواصلة اعداد مخطوطاتهم وفتح اضان الممولين والناشرين الى هذه الرارض التي ما زالت خلاءً لنشر المخطوطات. ومنذ ذلك التاريخ وحتى اليوم فقد صدر على الساحة التتشكيلية اربعين عنواناً، بدلاً عن اربعة عناوين قبل حوالي عقد من الزمان. فهل كده كفاية؟
الاجابة بالطبع لا.
الأسوأ من ذلك هو أنَّ هذه الاصدارات، وعلى قلتها، فالعثور علي اي منها هو امر في غاية الصعوبة. لان جزء منها قد نفد من المكتبات، والمتبقي منها ليس من السهل معرفة مكان تواجده أو حتى مجرد العلم بصدوره.
المهمة التي يضطلع بها تجمع التشكيليين الآن( وتجمع التشكيليين ليس هو اتحاد التشكيليين /ديل الجماعة بتاعين الثورة) هي توفير ما تيسر منها داخل مكتبات المؤسسات التعليمية المعنية بتدريس التشكيل، لتوفيرها للطلاب المعنيين بالدراسة الاكاديمية للتشكيل. لاحظ الليلة السودان الليلة فيهو حوالى تمانية مؤسسة من مؤسسات التعليم العالي بتدرس الطلاب التشكيل لكن ما فيها ولا مرجع عن اي جانب من جوانب الحياة التشكيلية في السودان. والبركة في محمد عبد الرحمن حسن انو ابتدر داخل كلية الفنون تدريس(التشكيل المعاصر في السودان)، مع غياب المراجع الضرورية. فالمهم هسي طلاب التعليم العالي البيردرسوا تشكيل. اما ناس، احمد سيد احمد، فبعدين الله كريم.


عادل السنوسي
مشاركات: 839
اشترك في: الاثنين مايو 09, 2005 8:54 pm
مكان: Berber/Shendi/Amsterdam

مشاركة بواسطة عادل السنوسي »

تحياتي وسلامي يا أخ محمد سيد أحمد.

أفيدك علما، بأن من متطلبات نيل شهادة الدبلوم، أو بكلاريوس من كلية الفنون الجميلة و التطبيقية في السبعينات( لا أدري ما هو الفرق = أقصد ما هو الفرق بين الدبلوم والبكالاريوس ؟!) هو تقديم بحث_ حر _ مكتوب، ك شرط لنيل شهادة التخرج، طبعا أنا أتحدث بما كان معمول به حتي عام 1981 في كلية الفنون ، عام تخرجي ، ولست أدري ما جري، أو ما كان يجري بعد ذلك، فلربما استعاضوا عن البحوث الثبتة، ب بعض خرافات أخري,


عطفاً علي ما تقدم يا صديقي محمد، أعتقد أن أغلب #المشكلين#، لا يغلبهم المقارعة بالقلم، ولو دعا الأمر، بالرأي، والفهم، و اللسان. أنت ذكرت بعضهم: شيخي بولا رحمه الله، وأمد الله في أيام أستاذنا حسن موسي، وصديقي العزيز محمد بوب، علي الهادي، وكاتب السطور أعلاه ، صلاح حسن، و غيرهم، و أنبهك إلي متابعة استاذنا النور حمد، يمكنك أن تجد بعض منه علي اليو تيوبُ في بعض حلقات، مرمط فيها الأخوان المسلمين ( التعبير من عندي، وليس من عنده) مرمطهم بالواطة ، بكل أدب!

ملحوظة: كان شيخنا الراحل أحمد الطيب زين العابدين رحمه الله يسمي التشكيلين الكتاب( الذين يمارسون الكتابة ) ب : التشكيلين الفصحاء!
آخر تعديل بواسطة عادل السنوسي في الاثنين يناير 27, 2020 12:51 am، تم التعديل مرتين في المجمل.
الفكر الديني ضعيف، لذا فإنه يلجأ الي العنف عندما تشتد عليه قوة المنطق، حيث لايجد منطقاً يدافع به، ومن ثم يلجأ الي العنف.( ... )
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

سلام

مشاركة بواسطة محمد سيد أحمد »

سلام صلاح حسن
كتبت
قرظت التشكليين باكثر من ما ليس فيهم
اظنها باكثر من ما فيهم
لا والله جد انا من فترة ملاحظ اسهامات التشكليين عميقة جدا
فى كتاب عن النقد السيمولوجى تقريبا اوراق فى ندوة فيها مساهمات من فنانيين فى المسرح والسينما والتشكيل والموسيقى مساهمة د محمد عبد الرحمن بوب عميقة جدا
المهم
الكسل فى اصدار الكتب ملاحظ جدا يعنى كاتب ومفكر كبير زى بولا ما تلقى ليهو كتاب
حركة النشر فى مجال المسرح نشطة جدا وانا قلت فى الورقة القدمتها فى مهرجان المسرح الوطنى السودانى قبل اسبوعين فى المسرح القومى بام درمان انو اكتر مجال من مجلات الفنون فى السودان من سينما وتشكيل وموسيقى عندها اصدرات هى المسرح ففى ما بين عام 2018 و2019 صدر ما يزيد عن 30 كتاب توثيقى فى المسرح السودانى بمساعدة من الهيئة العربية للمسرح كاكبر عدد من الاصدارات تطبع فى الخارج لكتب سودانية
ما يفوتنى اذكر
على سبيل المثال كتبت عدد من اسماء الكتاب التشكيلين
ونسيت
صلاح حسن احمد
صلاح الجرق
احمد الطيب
النور حمد

تخريمة
انا محمد سيد احمد
مرات بيحصل خلط مع احمد سيد احمد التشكيلى الفى لندن
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

سلام

مشاركة بواسطة محمد سيد أحمد »

سلام عادل السنوسى
كتابة بحث فى التخرج
اعتقد نظام معمول به ايضا فى كلية الدراما
وفى الموسيقى
وكذلك اعتقد فى معاهد السسنما خارج السودان من الشروط كتابة بحث

التشكيلين الفصحاء

ظابطة جدا

شكرا على هذه العبارة الجميلة
حسن موسى
مشاركات: 3621
اشترك في: الجمعة مايو 06, 2005 5:29 pm

بخيت و قنيط

مشاركة بواسطة حسن موسى »



سلام يا صفوة و شكرا على عنايتكم بسيرة الأدب التشكيلي في السودان.


يا محمد سيدأحمد

قلت :
"
طيب يا حسن
مرة القراية
ومرة الكتابة
شغال نصايح يا لقمان الحكيم

ورطة البتدور تسمو بخيت والما بتدورو تسمو هناى
عملت فيها شنو

اصحى يا ترس
"
ياخي نصحتك بالرسم و قلت ليك: الرسم بصلّح الكتابة، أدّيتنا أضان الحامل، و نصحتك بالقراية و قلت ليك:"إقرأ"، عشان القراية بتصلح الكتابة، برضو أبيت تسمع ،بعد كدا أنا مضطر أقرا ليك و أكتب ليك و ذنبك على جنبك.
أظن ـ غير آثم ـ أن الإشكالية التي يطرحها موضوع تكريم كمالا و جائزة حيدر و مؤسسة العويس الثقافية،هي على قدر من التركيب المفهومي كبير، يتجاوزالخفـّة التي تطبع مداخلاتك المتهافتة.و ما أتوقعه من المتداخلين في هذا الموضوع هو تجنيب القراء نوع الثرثرات التي تجود بها علينا يا محمد سيدأحمد لمجرد أنك راغب في ونسة تروح عنك ضجر المنافي.
و لوكنت حريصا على تمحيص موضوع مؤسسة العويس الثقافية بمنهج جاد، كان في وسعك طرح تفاكيرك في أي من الخيطين المخصصين لهذا الشأن في المنبر ، أعني الخيط المعنون بـ" و كمالا" و الآخر المعنون بـ"شايفين الكفيل و تطعنوا في ظله؟".و في كل خيط حاولت أن أبذل تفاكيري التي أسعى بها لإستجلاء دوافع الأطراف الضالعة في إشكالية مؤسسات رعاية الثقافة في العالم العربي . لكنك يا محمد سيدأحمد قفزت فوق كل هذه الإعتبارات و جيتنا فرحان بمثلك بتاع"ورطة" "بخيت" و "هناي"، عشان شايفك كتبته لينا أكتر من مرة.
أولا بالتبادي الزميل " هناي" دا اسمه الحقيقي"قنـّيط"، و المثل في صيغته الكاملة هو: « البتدورو تسمّي بخيت و الما بتدورو تسمّي قنـّيط"، لكنك يا محمد سيدأحمد تستحي، على جهل، من أدب الشعب و تتأفف عليه بعفة لسان زائفة مستعارة من "أوتيكيت" أدب الأفندي الحضري المنافق الذي "ياكل الراس و يخاف من العيون"، ربما لأنك فهمت " قنـّيط" بإحالتها لـ" قنيطة"و هي الإست في عامية السودانيين، بينما الـ "قنّيط" في فصاحة السودانيين ، و العهدة على عون الشريف قاسم ، لفظة سخرية تدل على الشخص الفدم القصير، و الفدم في لسان العربان هو الشخص الأحمق الغليظ الدم العيي عن الحجة الذي يلقي القول على عواهنه و لا يبالي..
شايف يا ترس؟
سأعود لموضوع مكاتيب التشكيليين و سيرة الكتاب فصبرا.
صلاح حسن عبد الله
مشاركات: 212
اشترك في: الثلاثاء مايو 10, 2005 11:40 am

هل على التشكيليين التعريف بانفسهم؟

مشاركة بواسطة صلاح حسن عبد الله »

سلام يا محمد سيد احمد والمعذرة للخطا في كتابة الاسم. وهو ما لم يكن نتيجة للخلط بين الاسمين لانو محمد سيد احمد(معروف لدينا) في سودان فور اوول، قبل وصول الاخ احمد سيد احمد. فالمعذرة للخطأ غير المقصود.
(لا والله جد . .). فكدي اول حاجة نخليها بدون حليفة. اكان حلفت انت، و انا ذاتي حلفت، بعدين حنلقى انو في واحد مننا لازم يستغفر. وبعد الاستغفار حيكون ما فى حل غير اننا نوقف الكلام الى حيث انتهت الحليفة. ام نحسبها حليفة عفوية باعت سودانيين ساكت( شفت ساكت دي كيف؟).
صحيح انو الاخ محمد عبد الرحمن قدم مساهمته ضمن اطروحات ورشة النقد السيميولوجي. ولكن الاهم من ذلك هو أنو الفكرة نفسها كانت فكرته هو. وقدمها اتحاد التشكيليين تحت مسمى( دورة تطوير الاداء المنهجي في النقد) واستمرت لمدة يومين بدار التشكيليين بالاشتراك مع اتحاد الكتاب السودانيين. ومحمد عبد الرحمن ساهم باكتر من كده في اعداد الورشة نفسها بشكل كامل(الاتصال بالكتاب، التدقيق اللغوي، جدولة الأوراق. . الخ) وصدرت الاواق قبيل انعقاد الورشة في كتاب باسم(دور اللسانيات في النقد الادبي والفني). وده كله باب خفي ومهم في كيفية ادارة شؤون التشكيل والتشكيليين. نخليهو لمرة تانية.

لكن وقفتني عبارة(الكسل) . . (الملاحظ جداَ في اصدار الكتب). والغريبة انك اوردت عبد الله بولا كنموذج لما تود توضيحة. فهل من السهل ان نلحق صفة(الكسل) وفي اي وجه من وجوهه ب(عبد الله بولا)؟ اعتقد انو النموذج هنا غير موفق.
واذا كان المسرحيين قد اصدروا(مابين عامي 2018و2019 ما يزيد عن 30 كتاب توثيقي في المسرح السوداني) فده تم (بمساعدة من الهيئة العربية للمسرح). وحسب تجربة التشكيليين السودانيين فهناك عدد من الاصدارات التي صدرت عن التشكيل خارج السودان، ودي لحدي هسي خارج حساباتنا. والاصدارات اللي تمت الاشارة اليها عن التشكيل صدرت كلها داخل السودان. ودي مسالة على درجة خاصة من الاهمية. لأنَّ الناشر خارج السودان لا سبيل له لنشر اصداراته داخل السودان لانعدام قنوات التوزيع الخاصة به داخل السودان والمسألة بتتحول ل(بزنيس) خاص بدار النشر المعنية.
نرجع لشح الإصدارات من الكتاب التشكيلي. وقد كان ذلك موضوعاً للمداولة ابتدره الاخ اسامة عباس في حوار له مع شخصي– 2006 -عقب صدور كتاب( مساهمات فيي الادب الشكيلي):" لماذا هذا الكتاب هو الأول عن التشكيل فى السودان؟" . وكانت الاجابة هي اجابة مطولة، اقتطف منها" النشر فى السودان يعمل فى ظل شروط سيئة للغاية كسوء شروط الصناعة فى السودان. أو فلنقل ، بشكل أدق، كسوء شروط الوجود الحياتى فى السودان."
نشر الكتاب هو ليس مسؤولية التشكيليين بل هو مسؤولية "الناشر".
في ورقته" نحو المشروع القومي للتشكيل – 2004- المجلس القومي لرعاية الثقافة والفنون" قال السيد الصادق المهدي( إنَّ على التشكيليين التعريف بانفسهم). اخذت فرصتي في المناقشة، وقلت ليه: هل على التشكيليين التعريف بانفسهم؟ ام على التشكيليين ان ينتجوا التشكيل؟ واذ تابعنا المنطق بتاع انو "على التشكيلين التعريف بانفسهم" فما هو دورالاجهزة الاعلامية في الحالة دي؟ وما هو دور أجهزة ودور النشر ومؤسسات التعليم؟
الصحيح هو انو كل زول يشتغل شغله صاح. التشكيلي يشتغل "التشكيل" صاح والناشر يشتغل "النشر" صاح، والوزير والمعلم . . الخ. كلهم ما نعفي واحد منهم من مسؤوليته.
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

رد

مشاركة بواسطة محمد سيد أحمد »

موضوع البوست عن كتابة التشكليين
تداخل فى صلب الموضوع صلاح وعادل

الا حسن موسى لا يكتب فى الموضوع بل
ليمارس تنمره المعهود
ويكتب اتعلم الرسم يا محمد سيد احمد عشان تعرف تكتب


ويكتب
ونسة تروح عنى ضجر المنافى
وطبعا حسن موسى حتى المنافى لديه فيها الخيار والفقوس
فسبل كسب العيش التى ساقتنا فى الخليج يظن انها ليست ما ساقته لفرنسا
وقد سبق له ان سخر لعمل محمد حسبو فى الخليج
يكتب حسن للخروج عن ورطته
موضوع مؤسسة العويس على قدر كبير من التركيب المفهومى يتجاوز الخفة والمداخلات المتهافتة
و استجلاء دوافع الاطراف الضالعة فى اشكالية رعاية الثقافة فى الوطن العربى
كلام كبير ما عندوش معنى زى ما قال اخونا المصرى
وامواج من الكلمات فى صحراء من الفكر كما وصف منصور خالد كتابة الترابى
طيب يا لقمان الحكيم انا كتابتى متهافتة وونسة ساى ليه عجزت عن الرد على سؤال الشقلينى البسيط جدا عندما اورد لك ما طرقع به كيبوردك فى مدح مؤسسة العويس فى حالة كمالا وذمها فى حالة حيدر
لن تستطيع تبرير موقفك مهما تحصنت بكلمات كبيرة
ببساطة لان ورطتك سببها ضغائك القديمة ضد حيدر
وياخ محمد سيد احمد دا لا بيعرف يقرا ولا بيعرف يكتب
ليه مداخلتى بكلمات بسيطة بترد عليها بمعلقات

وهاك نصيحة مجانية
فى علم استراتجية الحروب هناك ما يسمى تدعيم الفشل
ويقصد بها فى المعركة عندما تهاجم مرة وثانية وثالثة من نفس الجبهة و تفشل ولا تراجع خطتك هذا يعرف تدعيم الفشل
وانت تمارس فى فعل التنمر اللفظى مرارا وتكرارا
وفشلت فى اسكات محمد حسبو واسامة الخواض وعادل عبد العاطى والعشرات

اذا اردت المشاركة فى موضوع البوست مرحب
واذا اردت التنمر
لن ادر لك خدى الايسر
والترس صاحى
واللستك جاهز
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

رد

مشاركة بواسطة محمد سيد أحمد »

شكرا صلاح
عن المعلومات الاضافية عن محمد عبد الرحمن
وبوب نموذج للكاتب والمثقف العارف والمتواضع والمهذب
بوب يطرح اعمق الافكار بلغة بسيطة بدون حذلقة وفذلكة واستعراض

كويس النقاش مشى اكتر فى البحث عن الاسباب
فمثلا فى حالة بولا نبحث فى الاسباب التى حالت دون نشر كتبه

عندى ملاحظة كدا فى اصدارات المسرحيين لاحظت غالبية الكتاب من اصحاب الدرجات العلمية من بروف ودكتور وماجستير حتى البكالريوس
اظن من يخمل لقب دكتور يحرص ان يكتب كتب وينشر

ملاحظة فى مجال الرواية فى اصدارات كتيرة لشباب وشابات
حسن موسى
مشاركات: 3621
اشترك في: الجمعة مايو 06, 2005 5:29 pm

Re: رد

مشاركة بواسطة حسن موسى »

كتب محمد سيدأحمد:
"
اذا اردت المشاركة فى موضوع البوست مرحب
واذا اردت التنمر
لن ادر لك خدى الايسر
والترس صاحى
واللستك جاهز "





سلام يا محمد سيد أحمد
يا زول أنا استحق نوط الجدارة من الدرجة الأولى لأني أخرجتك عن طورك و خليتك تكتب كم و عشرين سطر من الأدب الرفيع.
و الله أنا كان عارف التنمّر بخليك تقعد تكتب اكتر من أسطرك التلاتة المعهودة كان صرفت ليك حبوب التنمر الجد جد ، حبة بعد الفطور و حبة بعد الغدا و حبة قبل النوم.

أما عن موضوع خدّك الأيسر فأنا زاهد في الشجار معك و دا طرفي و مبروك عليك لستكك و ترسك و واصل خيطك في سيرة أدب التشكيليين مافي قشة مرّة تعتر ليك.
سأعود في حالة الضرورة القصوى فقط
صورة العضو الرمزية
نجاة محمد علي
مشاركات: 2809
اشترك في: الأربعاء مايو 04, 2005 1:38 am
مكان: باريس

مشاركة بواسطة نجاة محمد علي »

سلام للجميع

كتبت يا محمد سيد أحمد


الكسل فى اصدار الكتب ملاحظ جدا يعنى كاتب ومفكر كبير زى بولا ما تلقى ليهو كتاب


كيف يا محمد أصبح بولا كاتب ومفكر كبير بدون انتاج فكري مكتوب قرأه الناس وتعرفوا من خلاله على الكاتب والمفكر؟
لأنه ببساطة كتب، وبغزارة. كتابة انتشرت، وفكر احتل مكانه الجدير به في الساحة السودانية وغير السودانية.
وبدون هذه الكتابة الغزيرة الممتدة من منتصف السبعينيات وهو صبي في الثلاثين وحتى آخر لحظة كان يمارس فيها الكتابة، ما كان من الممكن
له أن يسطر اسمه بين المفكرين الذين يعبر فكرهم الزمن ويبقى للمستقبل. ومثلما الكتاب هو حامل لرسالة، كذلك المقالات في المجلات والصحف
وأعمال المؤتمرات والندوات. ومثلما النصوص المكتوبة هي حاملة وناقلة للفكر، كذلك تفعل النقاشات الجادة في الندوات والمؤتمرات والوسائل المسموعة والمرئية.
وكان لبولا حضوره الكثيف النشط المؤثر المساهم في إحياء النقاش والتفاكر وإثراء الفكر عبر كل هذه الوسائط، في السودان وخارج السودان.
الكتابة يا محمد لازم تكون بين دفتي كتاب؟ مع أن لبولا عدد من الكتب التي صدرت منذ زمن، والتي صدرت مؤخراً، والتي سيعاد نشرها قريباً،
والتي ستصدر. ليس الكتابة الجادة المؤثرة هي وحدها التي تسطر بين دفتي الكتب. تأسس علم اللغة الحديث على علم وفكر رجل لم يصدر له ولا كتاب واحد في حياته.
هو عالم اللغة السويسري العظيم فردناند دو سوسير. وحتى كتابه الوحيد الذي صدر بعد رحيله يضم محاضراته التي جمعها طلابه، وصدر تحت
عنوان "دروس في علم اللغة العام". هذا الكتاب لم تتأسس عليه اللسانيات الحديثة فحسب، وإنما أيضاً علم السيميولوجيا. كما شكَّل أيضاً النواة
الأولى للبنيوية.
أها شايف يا محمد المساهمة التي قدمها هذا الكتاب الويحيد للفكر الإنساني؟ الكتاب الذي لم يصدر لمؤلفه ولا حتى كتاب واحد في حياته؟

محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

Re: سلام

مشاركة بواسطة محمد سيد أحمد »

محمد سيد أحمد كتب:سلام صلاح حسن
كتبت
قرظت التشكليين باكثر من ما ليس فيهم
اظنها باكثر من ما فيهم
لا والله جد انا من فترة ملاحظ اسهامات التشكليين عميقة جدا
فى كتاب عن النقد السيمولوجى تقريبا اوراق فى ندوة فيها مساهمات من فنانيين فى المسرح والسينما والتشكيل والموسيقى مساهمة د محمد عبد الرحمن بوب عميقة جدا
المهم
الكسل فى اصدار الكتب ملاحظ جدا يعنى
حركة النشر فى مجال المسرح نشطة جدا وانا قلت فى الورقة القدمتها فى مهرجان المسرح الوطنى السودانى قبل اسبوعين فى المسرح القومى بام درمان انو اكتر مجال من مجلات الفنون فى السودان من سينما وتشكيل وموسيقى عندها اصدرات هى المسرح ففى ما بين عام 2018 و2019 صدر ما يزيد عن 30 كتاب توثيقى فى المسرح السودانى بمساعدة من الهيئة العربية للمسرح كاكبر عدد من الاصدارات تطبع فى الخارج لكتب سودانية
ما يفوتنى اذكر
على سبيل المثال كتبت عدد من اسماء الكتاب التشكيلين
ونسيت
صلاح حسن احمد
صلاح الجرق
احمد الطيب
النور حمد

تخريمة
انا محمد سيد احمد
مرات بيحصل خلط مع احمد سيد احمد التشكيلى الفى لندن
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

ؤد

مشاركة بواسطة محمد سيد أحمد »

تحياتى استاذة نجاة
كتبت عن كون الكسل سبب فى شح النشر وكنت اقصد التعميم ولم اوفق فى تخصيص بولا
لذا اعتذر وقد قمت بسحب هذه الجزئية من البوست
وانا اعرف حرص بولا على النشر وقد تابعت تدقيقه الكبير ومناقشة التفاصل فى احدى المحاولات للنشر
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

رد

مشاركة بواسطة محمد سيد أحمد »

البوست معنى
بفكرة تميز كتابات التشكيليين
وفكرة قلة اصداراتهم

عن تميز الكتابات
اعتقد من الاسباب توفر كادر تدريسى جيد فى كلية الفنون
فكلية الفنون كلية عريقة بها كوادر تدريسية بتاهيل عالى ومعرفة وثقافة
الرعيل الاول من اساتذة الكلية تلقوا الدراسات العليا فى الغرب وبلغة اجنبية
محمد سيد أحمد
مشاركات: 693
اشترك في: الاثنين مايو 09, 2005 8:21 pm
مكان: الشارقة

Re: التشكيلين ديل مشوطنيين عديل كدا

مشاركة بواسطة محمد سيد أحمد »

محمد سيد أحمد كتب:امس وانا استمع للصديق التشكيلى العزيز د محمد عبد الرحمن بوب
باعجاب واستمتاع لفكره النير وقدرته على التعبير بلغة عميقة وبسيطة
تذكرت محمد الكاتب والناقد والمفكر
وسرحت فى استحضار مساهمات عدد من التشكليين اصحاب القدرات الكتابية
الرسم دا ما اصلو شغلهم لكن اى واحد فيهم يدهشك
الصديق على الهادى عرفته رساما وفنان مبدعا ولاحقا كشف عن موهبة عظيمة فى الشعر والكتابة النثرية بلغة باذخة

ومن الرعيل الاول كلهم ما بيتصاقو فى الكتابة
بولا كبيرهم الساحر
حسن موسى
النور احمد على
تاج السر الملك
عماد عبد الله
على الهادى
محمد عبد الرحمن
وغيرهم وهلمجرا

مقارنة مع خريجين مجالات الفنون الاخرى فى المسرح والموسيقى والسينما
اسهاماتهم كثيرة وبقيمة علمية كبيرة جدا
فقط اعتب عليهم لكسلهم فى اصدار الكتب
أضف رد جديد