حجوة كردفانية بالفرنسية في "بابل إفريقيا"

 
انشر موضوع جديد   رد على موضوع    sudan-forall.org قائمة المنتديات -> منبر الحوار الديمقراطي
استعرض الموضوع السابق :: استعرض الموضوع التالي  
مؤلف رسالة
حسن موسى



اشترك في: 06 مايو 2005
مشاركات: 3587

نشرةارسل: الاربعاء يونيو 03, 2020 3:08 pm    موضوع الرسالة: حجوة كردفانية بالفرنسية في "بابل إفريقيا" رد مع اشارة الى الموضوع


كما و لايبي





نشرت دار غاليمار للشباب

Gallimard Jeunesse
مجموعة حكايات شعبية من إفريقيا تحت العنوان" بابل إفريقيا"
Babel Africa
و قد اشرفت على جمعها الحكواتية الفرنسية موريل بلوك
Muriel Bloch
و زينتها بالتصاوير الفنانة ماغالي أتيوغبي
MagaliAttiogbé
و قدمت لها أنجليك كيجو
2020
في صدارة السفر تحكي باتريسيا موسى حجوة نوباوية من السودان تحت عنوان" كاّما و لايبي" و قد سجلتها من الراوية الكردفانية عاشة عبد الله في ثمانينيات القرن العشرين.
هذه الحجوة النوباوية تنطوي على سحر أدبي بين لأنها تحكي عن قوة العاطفة التي تلهم المحبين مواجهة المصاعب التي تحول دون الوصال ومغالبة الموت و دحره في عقر داره. هذه الحبيبة النوباوية تستعيد حبيبها من ظلام القبر و تمنحه حياة جديدة من طاقة الحب و هي أقوى من "جولييت" بطلة "روميو" التي تقبل الموت باسم الحب، بل هي اقوى من "الأميرة النائمة" لمئة عام في انتظار قبلة الحبيب التي ستوقظها من موتها المؤقت الطويل.و قوتها تكمن في كونها تملك زمام المبادرة على طول الخط السردي للحجوة. فهي بادرت بالحب و بادرت بالبحث عن الحبيب الغائب و بادرت ببعث الحياة في اوصال الحبيب الميت .اين منها" جولييت"؟ و اين "شهرزاد"؟ و أين "ايزولدا"؟ و أين"ليلى"؟ ؟




كان في و لد
في بنية سمحة كدا كمان
كمان البنت دي اخوانهاخافوا ليها عشان ما تحمل او تعمل ليهم حاجة كدا.
مشوا كمان حفروا ليها حفرة كدا.
دخلوها فيها جوة الحفرة دي.
خلاص اخوانها قاموا فاتوا.فاتوا.
بس في ولد واحد. مع اولاد كتار. اولاد عرب بس بيسرحوا بالبقر.
لمان جوا.، جوا قعدوا جنب في محل الحفرة دي.. قامت البنت طلعت
بالسلم براحةكدا.طعنت الولد بالمخرز.بس من هناك الولد قام قال
لاخوانه:"حي قوموا اراحكم، قوموا اراحكم.
قاموا فاتوا.
قاموا لما فاتوا قريب الحلة، قا م قال ليهم :   «  هوي يا جماعة انا نسيت السكبن حقي هناك، محل القبيل كنا قاعدين.
الاولاد قالوا ليه : خلاص ارحكم ممكن في اي وقت تجيبوا.
قال ليهم : لا لا لا انا هسع بمشي اجيب السكين دا.
يلا قام فات. لمان فات لقى حاجة كدا مغطي. قام رفعه.اصله ولا خاف ولا قال في حاجة هنا تاكلني ولا حاجة. بس مشى ٌقعد مع البنية.
قعد معها لحدي ما البنية حملت خلاص.
يلا قام مرق فات. قام قال ليها : انا بديك الخاتم دا.
اداها خاتم وادىاها دبلة.
قال ليها : انت كان ولدتي بنت تديها الخاتم. كان ولدتي ولد تديه الدبلة.
خلاص قام فات.البنت قعدت, البنت حملت.
البنت ولدت. ماشوا جابوا ليها الداية.
الداية قالت ليها : طالما انا ولدتك و انت خايفة من اخوانك شيلي ولدك.
وامشي من المحل دي هناك. ماتقعدي.
كا ن قعدت هنا الناس بيقتلوكي.
اخوانك يجوا يقتلوكي.
خلاص البنت قالت ليها : سمح
خلاص. البنت شالت ولدها و فاتت. فاتت.
اي محل البقارة جنهم النقارة.
اي حتة كدا. تلقى نقارة كدي تدق تمشي ليها.
قعدت تقول :
النقارة تبكي
النقارة تبكي
ما شفتوا لي لايبي
لايبي ود السريلة
من هناك اي محل تمشي النقارة قاعد تدق ،هي تقول ليهم :
النقارة تبكي
النقارة تبكي
ما شفتوا لي لايبي
لايبي ود السريلة
يقولوا ليها : امشي،. ناس لايبي قدام.
تمشي. تاني تلقى نقارة. تاني تغني نفس الاغنية دي.كدااااا.
كدااااا. لمن وصلت الفريق حقهم، قعدت تغني ليهم.
اهل الولد من شافوها كدا قام قالوا : هاي، داك البنية ود السريلة مات
عشانها. بس من هناك مشت. قامت غنت
النقارة تبكي
النقارة تبكي
ما شفتوا لي لايبي
لايبي ود السريلة
يلا من هناك امه قالت ليها : هسع دي. الناس البتشوفيهم مشوا دفنوه.راجلك دا، مشوا دفنوه. هسع دا. وجو كدأ منه.
بس هي مشت.
قامت الناس دفنوه و غطوه بالشوك و كدا دا.
قالت :
يا شوك هاي
ما شفتوا لي لايبي
لايبي ود السريلة
ينقص علي
خلاص. الشوك من القبر زح.
براه قام زح.
تاني شافت التراب, قامت قالت :
يا تراب هاي
ما شفتوا لي لايبي
لايبي ود السريلة
ينقص علي
بعدين التراب دا قام زح
و ظهر ود اللحد.
بردو غنت كدا, ود اللحد زح.
شافت الكفن.
غنت كدا :
يا كفن هاي
ما شفتوا لي لايبي
لايبي ود السريلة
ينقص علي
بس الكفن انفتح من الزول دا.
قامت قالت ليه :
هاي لايبي
انت مش لايبي
لايبي ود السريلة؟

بس الولد صنقر . الميت دا. يلا هي خشت جوة .
.لمن اهل الولد شافوه كدا، جابوا تور كبير.
كرموا ليهم غادي هناك.
و خلاص انتهت القصة.
انتقل الى الاعلى
استعرض نبذة عن المستخدمين ارسل رسالة خاصة
نجاة محمد علي



اشترك في: 03 مايو 2005
مشاركات: 2782
المكان: باريس

نشرةارسل: الخميس يونيو 04, 2020 7:38 am    موضوع الرسالة: رد مع اشارة الى الموضوع


Que c'est beau l'amour


سلام يا حسن
وشكراً على نقل حكاية كاّما و لايبي وإمتاعنا بها.

وسلام يا باتريسيا
والله بعد أحاجي كردفان الجمعتيها وكمان حكيتيها بلهجة كردفانية، إنتي ذاتك بقيتي حجوة كردفانية تتحكي.

انتقل الى الاعلى
استعرض نبذة عن المستخدمين ارسل رسالة خاصة
نجاة محمد علي



اشترك في: 03 مايو 2005
مشاركات: 2782
المكان: باريس

نشرةارسل: الخميس يونيو 04, 2020 3:17 pm    موضوع الرسالة: رد مع اشارة الى الموضوع

.




تمثلات صورة الأم في أحاجي النوبة: تحليل لحجوة "جلد الأم". الجزء الأول
د. باتريسيا موسى
لندن، مارس 2019
مجموعة اجندة مفتوحة





تمثلات صورة الأم في أحاجي النوبة: تحليل لحجوة "جلد الأم"، الجزء الثاني
د. باتريسيا موسى
لندن،27 مارس 2019
مجموعة اجندة مفتوحة
انتقل الى الاعلى
استعرض نبذة عن المستخدمين ارسل رسالة خاصة
استعرض مواضيع سابقة:   
انشر موضوع جديد   رد على موضوع    sudan-forall.org قائمة المنتديات -> منبر الحوار الديمقراطي جميع الاوقات تستعمل نظام GMT
صفحة 1 من 1

 
انتقل الى:  
لاتستطيع وضع مواضيع جديدة في هذا المنتدى
لاتستطيع الرد على المواضيع في هذا المنتدى
لا تستطيع تعديل مواضيعك في هذا المنتدى
لاتستطيع الغاء مواضيعك في هذا المنتدى
لاتستطيع التصويت في هذا المنتدى

قوانيــــــن منبر الحوار الديمقراطي

 

الآراء المنشورة بالموقع لا تعبر بالضرورة عن رأي الجمعية السودانية للدراسات والبحوث في الآداب والفنون والعلوم الإنسانية


  Sudan For All  2005 
©
كل الحقوق محفوظة