"إسمي عواطف"، تماضر شيخ الدين

 
انشر موضوع جديد   رد على موضوع    sudan-forall.org قائمة المنتديات -> منبر الحوار الديمقراطي
استعرض الموضوع السابق :: استعرض الموضوع التالي  
مؤلف رسالة
حسن موسى



اشترك في: 06 مايو 2005
مشاركات: 3587

نشرةارسل: الاربعاء يونيو 24, 2020 5:10 pm    موضوع الرسالة: "إسمي عواطف"، تماضر شيخ الدين رد مع اشارة الى الموضوع




اسمي عواطف





اسمى عواطف ...
ساكنة الثورة...
عندى تلاتة وبمشى المكتب

ابلتق فيهم قدر الفي

استر الحال
واغطى العورة

مرة طماطم ومرة قميص
مرة بطاطس ومرة رغيف

قدر ما نسدها هى بتتقدّا

غايتو رضينا بنمشى المكتب

قالو اتلفلفوا اتلفلفنا
بى توب بملاية اتكلفتنا
قالوا انطموا انطمينا
البص بى عشرة
البص بى عشرة
الفحمة الواحدة بقت بى خمسة
وفى الدكان الفول بالدستة
العيش مافي
سكر مافي
الزيت مافي
بنزين مافي
تراب وعجاجة وحتى المطرة السنة دى مافي
وغايتو رضينا بنمشى المكتب

؟وشن المكتب
ورق مردوم وفارو قصادو
رئيسك كوز
ونايبو حرامى
غفيرنا جنوبي زى السوط بشوش وبسلم
سيد المطعم سمين ومدوعل ومشلخ سلم
امين المخزن تاجر يبيع قى السوق الشعبي وشنبو مبرّم
مراسلة شيوعي ومابتكلم
وصنة شديدة
شعب مأطر ودوره مقسم صنة شديدة حكاية تهمم
وبرضو رضينا بنمشى المكتب

لما تمغرب
بنفتح تلفزيون امدرمان اقصد تلفزيون الثورة
يجوك ناس كدة لابسين اخضر
زعلانين منك
يهرجوا فيك ويضربوا الروري
ورورورورورك
الله اكبر بحمدالله فتحنا جوبا بحمدالله دخلنا الكرمك
سودان ياميري طمبرة ماهية مافى سودان ياميري

لابجيبوا سيرة الاستعباد
لابجيبو سيرة الاستبداد
لاقالوا يوم فلان كتلوه
يتـّموا اولادو وسحلوه
(محاكية)
والانتاج والعلاج
عينك للبشتنة والعولاق وشابكننا انتاج وعلاج
خالتى خديجة كجك تتغطى وتقنت ليه وتديو ضهرا
-كضب السواد

والكهربا تقطع
وتسمع جاااااااااااااااك فى جوف الحارة
-هى مالكم نعل ماطيبة؟
-الشافعة سهاد وقعت من فوق قصت ضهرا
-ضربتا كهربا؟
-هى بسم الله الكهربا قاطعة تكوس فى الشمعة
ماشة تكابس للكبريتة
الكرسى رماهاا الطين زلقا
مامعروف كان كسرت ايدا واظنها ماتت
-هى قولن بسم الله هى ماتشوفن تكسى حسن
-حسن ياتو؟ حسن ودباشا؟
دة التكسيو واقف يومين عدمان القطرة؟
ماشايفاو قاااعد فى الضللة يفاقق ساي فى الكورة وفى الأسعار وكلام النشرة؟
-هى ترى قامت
-انخلعت ساي
ماديرين لمة
-الليد طيبة بجيبوا بصير

وهم طبعا عارقين الخيبة الجاية
قروش التكس والبنج المافى واشعة اكس
وقايمة مافي
-انخلعن ساى
وبالحال دة ماشين ساااااااي
وبرضو رضينا بنمشى المكتب

يوم فى المكتب وزى العادة ولما تسخن وتبقى جهنم
بنمشى نقنب تحت الشجرة
فى كنيبة كدى وكرسى مكسر وحجر وبلاطة
بنقعد نتونس
جنب ست الشاى
نتكلم يعنى عن حالتنا وحال الدنيا
كنت انا ومحمد وسلوى وابراهيم ومعاناالسيد
السيد دة ما بنعرفو كويس بجي لى سلوى
سلوى مليسة واظنو هو كيسا
ابراهيم دة اغبش وساخر
محمد طيب وزى متحمس

ويعنى كلام اتجدع
-لى شهرين ماضقت اللحمة
-نحن سنة بناكل قراصة
-نحن سخينة
-ونحن على الدكوة ترسينا
-وعاد لمتين؟
دى انا القلت عاد لمتين
وقامت كبرت عاد لمتين
محمد فام يتنفض كلو
صحى لمتين؟ الجوع كافر الشعب جبان
لازم نتحرك
ابراهيم حاول يثنيه ومحمد يزيد لازم نتحرك
اما السيد ماقال حاجة لكن واضح ما كان راضى
وسلوى معاهو تتمحرك وتضحك
غايتو كلامنا اتدهده مات
جاتنا تلاتة مشينا نكابس للثورات
الثورة نص الثورة ظلط عاد الثورات ماكترت
ركبت البص فى شمس الضهر البتعرفوها
الحر البغلى العرق الجاري
ناس تتآكل من آلاما وصمتها قاتل عندها كتمة
غايتو ازدحمت بنات افكاري
جانى كلامو محمد تانى وجضة فاطنة وناس حلتنا
غفيرنا جنوبي وزى السوط بشوش وبسلم
وكرش الزول الماسك المخزن

وصلت البيت شفعي يتخاتفو فى اللقمة
الجيران يتشاحدوا فى الكسرة
اللمات خانقاهن عبرة
الماسورة العادمة القطرة
خليناك يا رش السهلة
وخليناك يا زمن المهلة
من المغرب نقفل بابنا خلينا زيارت اصحابنا
غايتو رضينا مشينا ننوم
ونحمدو رب القدرة علينا بعد البينا بنمشى ننوم

جونا اتنين الساعة اتنين
رجال الليل رجال الغفلة
دفرو الباب وكسرو الطبلة
-حتمشي معانا
-هي ماشين وين؟
-حتمشى معانا
-واولادي الراقدين نايمين
_حتمشي معانا
_واخواني الما شغالين
_حتمشي معانا
-وناس امي البيتم من طين
حتمشي معانا حتمشي معانا يجابدوا يناتلو حتمشي معان... حتمشي معانا
لقيت روحي جوّة الزنزانة
والله يجيركم من الصمت الفي الزنزانة ومن الوحشة الفي الزنزانة

شهرين لازول بسأل لاعارفة الحال دة آخرو متين

وبعد شهرين بدا التحقيق
جوني اتنين ساقوني لمكتب ضابط
معاه اتنين ساقوني لمكتب تانى
فتحوا الدفتر وزي الاسد الضابط ينتر
-عندي معلومات هنا انك بتحرضي ناس المكتب
-انا؟
-بتعرفي ابراهيم ومحمد؟
-آي ديل بالضبط زملاي فى المكتب
-في يوم اغبر تحت الشجرة مش انتي القلتى عاد لمتين؟
-آي قلت..... بس
-خلاص دي التهمة الجاهزة .... دا التحريض الضد الدولة
-عارفة انتي عملتي شنو؟ وعارفة جرحتي شعور منو؟
-انا جرحت شعور؟ شعور منو؟
-سيد وسلوى
_نعم؟
-لأنو سيد دة موظف فى ال.... اقصد سلوى موظفة فىال...
ومامهم تعرفي
عشان نتأكد دايرين نعرف اسمك عنوانك وضعك؟

-اسمي عواطف ساكنة الثورة عندي تلاتة....و.....

-تلاتة؟ ابوهم وين؟
-عندى تلاتة ابوهم ميت وبرضو جرحت شعور ناس سيد؟
ابوهم ميت عذبو سجان بربري زيك
مات والناس صبحانة تعيد
وبرضو جرحت شعور ناس سيد؟
شفت بريق حدقات اطفالو؟
هي البتهدد عرش السيد
هي البتأسس لى يوم بكرة
وللمستقبل تبني تشيد
شفت الوعي الدافر وجايي
شفت النبت القايم وجيد
دة البجهجه ناس السيد
وليكم يوم يا ناس السيد
ليكم يوم ياناس السيد.


تماضر شيخ الدين
انتقل الى الاعلى
استعرض نبذة عن المستخدمين ارسل رسالة خاصة
استعرض مواضيع سابقة:   
انشر موضوع جديد   رد على موضوع    sudan-forall.org قائمة المنتديات -> منبر الحوار الديمقراطي جميع الاوقات تستعمل نظام GMT
صفحة 1 من 1

 
انتقل الى:  
لاتستطيع وضع مواضيع جديدة في هذا المنتدى
لاتستطيع الرد على المواضيع في هذا المنتدى
لا تستطيع تعديل مواضيعك في هذا المنتدى
لاتستطيع الغاء مواضيعك في هذا المنتدى
لاتستطيع التصويت في هذا المنتدى

قوانيــــــن منبر الحوار الديمقراطي

 

الآراء المنشورة بالموقع لا تعبر بالضرورة عن رأي الجمعية السودانية للدراسات والبحوث في الآداب والفنون والعلوم الإنسانية


  Sudan For All  2005 
©
كل الحقوق محفوظة