أنا ذاتــــــي مهمّـــش الجزء الثاني

 
انشر موضوع جديد   رد على موضوع    sudan-forall.org قائمة المنتديات -> منبر الحوار الديمقراطي
استعرض الموضوع السابق :: استعرض الموضوع التالي  
مؤلف رسالة
عمر التجاني



اشترك في: 09 مايو 2005
مشاركات: 228

نشرةارسل: الاربعاء يونيو 01, 2005 8:44 am    موضوع الرسالة: أنا ذاتــــــي مهمّـــش الجزء الثاني رد مع اشارة الى الموضوع

حكاوي المهمــّـشين

أنا ذاتـــــــــي مهمـّـش
الجزء الثاني


قمت مرقت ليك من الدكان داير أطق من الزعل.أسوي شنو ما عارف.قمت لفيت شوية في الحلة، أمر ليك قدام دكان واحد أنا متأكد مليون في المية إنو من المهمشين. المهم يا زول ما اطول عليكن.قمت دخلت الدكان سلمت. صاحبك رد علي تحت نخريه. دون أن يعيرني أي التفات أو حتى ينظر إلىّ. فوقفت صامتا وبعد هنيهة قال لي دون أن يرفع راسه.
ـ عايز شنو يا عم؟
قلت ليه.
ـ جيب وجيب وأهم حاجة فلوس ما عندي.لغاية الأسبوع الجاي.الأربع الخميس حكاية كده.
ـ الأسبوع الجاي متين يعني بالظبط كده؟
ـ يا سيدي قول يوم السبت البعد الجاي
قام صاحبك وزن لي الدايره كله وختاهو لي في كيس.قمت شكرته ليك جدا وقلت ليه.
ـ أها يا أبني الحساب كم يعني عايز مني كم؟
قام قال لي مبلغ خرافي يعني طوالي ضرب الحساب في أربعة. قمت قلت ليه.
ـ ليه يا أبني تعمل كده؟
قام قال لي.
ـ ما ده بالدين.
ـ يعني لأني إدينت منك تقوم تضاعف لي المبلغ.ده استغلال أنا برفضة. إنت قايل البلد دي ما فيها حكومة ولا شنو يعني؟
قام طوالي جر الكيس مني ورماه جوه الدكان بي زعل. وقال لي .
ـ أمش جيب الحكومة خليها تديك بالسعر الدايرهو.
ـ خلاص يا أبني جيب الكيس وأمرنا لله.
ـ لا في كيس ولا هم يحزنون يللا إتوكل.
يا زول رجعت البيت لامن من الزعل داير يجيني ضغط.المهم حصلت قصص مع المره اسكت خليها ساكت ما في داعي للكركرة. جنس مكافته وملافحه خليها علي ربك.
وقعدت في الواطه أفكر يا ربي اسوي شنو؟ قمت قلت يا ولد طالما إنك مهمــّش نمره واحد ليه ما تكوّن رابطة المهمّشين الدولية ومقرها بربر. أها المهمـّـشين ديل أحددهم كيف؟ أول فكرة جاتني أقوم أمشي السوق أي زول لا بس سفنجة في كرعيه ده مهمّش. الفكرة دي وقعت لي تمام . قمت طوالي مشيت السوق. أول زول يلاقيني ليك في الطريق كان عمر طلب الملقب بعمر سفنجة. قلت أوب واحد سلمت عليه وما اتكلمت معاهو أبدا .أوب لا قتني ليك عمتي بت عـلّــج ( بتشديد اللام) قمت قلت دي مهمّشة نمرة واحد دي مهمة لإدخال العنصر النسائي في زمرة المهمـّشين ولضمان عدالة التمثيل للجنسين. عشان كده حنديها منصب نائب الرئيس.
وصلت السوق، عاينت في كرعين الناس لقيتم ليك كلهم لابسين سفنجات.نان عمر طلب الجن مالو ملقبنه بي عمر سفنجة شقي القيد براهو ما كل الناس لابسين سفنجات.يا زول صرفت النظر من حكاية تحديد المهمـّمش بالطريقة دي. قمت رجعت البيت،وتاني قعدت في الواطة اشخط بي أيديّ في التراب.قامت جاتني ليك فكرة بت كلب. إنو أي زول باب بيتم من دوم، وللا ما عندهم باب ده زول مهمـّش. واي زول باب بيتم حديد ومزخرف ده ما مهمش. قمت طوالي مرقت .أول باب كان باب عمتي بت علّـج قت أوب أهي نائب الرئيس. قمت لفيت بالشارع التاني لقيت باب ناس عمي همزة. قمت مشيت لقيت باب ناس صلاح عوض. صلاح عوض ده ما بينفع ولا حاجة معاي حيقوم يقول لي ندخل ناس الكورة معانا وناس نادي الأمير.أنا جني وجن ناس الكورة. ديل ناس ذاتم ما مهمـّشين. يا أخي الفكرة البي تدخل صلاح عوض دي ذاته ما عايزه. وغيرت رايّ.
يا زول رقدت في السرير بالليل بلا عشا. وقعدت أفكر أعمل شنو وديت يمين شمال . بالليل شوية جابت ليها شوية برد. قمت دخلت رقت في السرير جوه. جا سعد أخوي بالليل لقاني ليك راقد في السرير قام قال لي .
يا أخينا قوم دخل سريرك.
قمت أمري لله دخلت سريري ورقدت . طوالي فكرت أعمل ....
حركة تحرير بربر مربع اتنين منزل رقم تمنطاشر الغرفة البرانية السرير الغربي.
انتقل الى الاعلى
استعرض نبذة عن المستخدمين ارسل رسالة خاصة
بابكر حسن بابكر



اشترك في: 09 مايو 2005
مشاركات: 6
المكان: ليون ـ فرنسا

نشرةارسل: الخميس يونيو 02, 2005 9:27 am    موضوع الرسالة: رد مع اشارة الى الموضوع

Very Happy
والله ياعمر يا اخوي
......... زولك ده متعب نفسو سااااكت ..........
كلنا مهمشيييييين من اغصئ الشمال الي اغصئ اليمين ............
لكن البقنع الدييييييييييييك منوووووووووووو Exclamation
انتقل الى الاعلى
استعرض نبذة عن المستخدمين ارسل رسالة خاصة
عمر التجاني



اشترك في: 09 مايو 2005
مشاركات: 228

نشرةارسل: الخميس يونيو 02, 2005 9:33 am    موضوع الرسالة: رد مع اشارة الى الموضوع

بابكر أبو التيمان براهو مهمش؟

عارفك أبو المهمشين بس المهمشين ديل ما التيمان يسلموا ويسلم أبوهم لكن حكاية التهميش دي بكلمك بيها.
أشكرك وتحياتي لأسرتك
انتقل الى الاعلى
استعرض نبذة عن المستخدمين ارسل رسالة خاصة
استعرض مواضيع سابقة:   
انشر موضوع جديد   رد على موضوع    sudan-forall.org قائمة المنتديات -> منبر الحوار الديمقراطي جميع الاوقات تستعمل نظام GMT
صفحة 1 من 1

 
انتقل الى:  
لاتستطيع وضع مواضيع جديدة في هذا المنتدى
لاتستطيع الرد على المواضيع في هذا المنتدى
لا تستطيع تعديل مواضيعك في هذا المنتدى
لاتستطيع الغاء مواضيعك في هذا المنتدى
لاتستطيع التصويت في هذا المنتدى

قوانيــــــن منبر الحوار الديمقراطي

 

الآراء المنشورة بالموقع لا تعبر بالضرورة عن رأي الجمعية السودانية للدراسات والبحوث في الآداب والفنون والعلوم الإنسانية


  Sudan For All  2005 
©
كل الحقوق محفوظة