محجوب شريف: آخر شي

Forum Démocratique
- Democratic Forum
أضف رد جديد
مصطفى مدثر
مشاركات: 935
اشترك في: الاثنين مايو 09, 2005 10:26 pm
مكان: هاملتون-كندا

محجوب شريف: آخر شي

مشاركة بواسطة مصطفى مدثر »


د. ياسر المليح حُظي بأربع قصائد جديدة لمحجوب شريف.
دق بالخرطوش، أقصد فيديوهات ستنزل على اليوتيوب
هنئياً لك يا يا سر!
كان معه اليوم.
بعدها زرنا محجوب اسكائبياً ولقينا معاهو مي إبنته وقاسم
أمين زوجها يعني (سودان- ألمانيا- كندا) فقدم لنا محجوب
العروض. آخر ملبّس من شوكولاتات محجوب!
بوتوم لاين: محجوب بخير وقادر على قراءة الشعر والونسة العادية دي!
فهاكم واحدة اسمها "أو فانتظر!" يخاطب فيها أمنجي (في ما يبدو لي)
والباقي يجيب ليكم لينكاتو دكتور ياسر المليح:




أو فانتظر!

لا إنتو جند الله
ولا جند الوطن
بل إنتو حقاً جندهم
وبعض من ما عندهم
سندة قفاهم وغمدهم
لكنهم هم
ما ح تسكن حيّهم
ولا ح تاكل زيهم
ولا ح تلبس إنت زي
زي زيهم
واذا عطشت،
بعيد بعيد،
ما تقترب من ريهم
هل شفتهم
ملأوا الشوارع
في الصباح،
عند الظهيرة مغبرين
طالعين من الوردية
والليل انتصف؟
باين على وجوهم تعب؟
وزمن صعب؟
القفة
والدكان
ودخان الفرن
ومرتبات حال الثبات
لا تحل وظيفة ولا نبات
هل شفتهم بين كر وفر
والدنيا حر
بين صف وصف
واحد وقف
هل شفت يوما هؤلاء؟
هل تذكرهم؟
زاروكا يوم أو زرتهم
بس إلاّ في شارع ظلط
ومظللاتهم مسرعة
كلا ولن ولا بالغلط
ما شفتهم
على إيه إذن
لي مين إذن
وانت بتشوف
غرقانة كم
في الدم
مفاتيح الخزن
هم دربوك على الأذى
تقتل تدوس
تحرق
ولا يهمك
كذا ولا كذا ولا كذا
كم فر طاغية من بلد
ما خلا غير كلب الحراسة
يئن وحيداً في القفص
متلك مصيرو
العزلة والخوف والجزع
إن متَ حتى ولا عزا
حكّم ضميرك يا ولد
أمشي استحمى واعتذر
واغسل يديك
من كل ما يخليك
أمام روحك قذر
ألبس عراريق الحياة اليوماتي
واقدل في الدرب
لا يدسو منك لو غشيت
ولا إنت أقرب زول إليك
منك حذر
أو فانتظر
أو فانتظر
أو فانتظر!
ياسر الشريف المليح
مشاركات: 1745
اشترك في: الاثنين مايو 09, 2005 7:24 pm
مكان: ألمانيا
اتصال:

مشاركة بواسطة ياسر الشريف المليح »

سلام يا مصطفى

والجميع

نعم. كنا البارحة في حضرتهم الجميلة وكانت ساعات عامرة. سأقوم بتحميل القصيدة في يوتيوب بعد قليل.




هذه الفقرات سمعتها هكذا

زندهم [بدلا عن غمدهم]

سندة قفاهم وزندهم



ـــ
باين على عيونهم تعب؟
وزمنا صعب؟

[بدلا من :
باين على وجوههم تعب؟
وزمن صعب؟]

ـــــــ
ومرتبات
حالة ثبات

[بدلا من ومرتبات حال الثبات]

ــــ
زاروكَ يوم أو زرتهم

ـــ
تكتل تدوس

ـــ
لا يدسو منك لو غشيت
وتلقى أقرب زول إليك
منك حذر

ــــ

ياسر
ياسر الشريف المليح
مشاركات: 1745
اشترك في: الاثنين مايو 09, 2005 7:24 pm
مكان: ألمانيا
اتصال:

مشاركة بواسطة ياسر الشريف المليح »

هناك معي مشكلة في التحميل.. صار بطيء جدا ولا أعرف ما هو السبب. تمكنت من رفع شريحة القصيدة ولكن يتعين علي معرفة المشكلة وحلها حتى أتمكن من رفع الشرائح الأخرى.

https://youtu.be/v4IjakLVcKs

https://www.youtube.com/v/v4IjakLVcKs
ياسر الشريف المليح
مشاركات: 1745
اشترك في: الاثنين مايو 09, 2005 7:24 pm
مكان: ألمانيا
اتصال:

مشاركة بواسطة ياسر الشريف المليح »

ود حامد كتب في الراكوبة اليوم
https://www.alrakoba.net/news-action-show-id-62185.htm
حقيقة أنت شاعر الشعب يا أستاذمحجوب شريف .....أنت المعبر عن دواخلنا ...و أحلامنا .. و أمانينا .. الله يديك الصحة و العافيه و يزيل عنك كل بلا يا محجوب ... كم تنبأت بماسيكون فى الغد و هذى واحدة من ما تنبأت بها.......

أرفع راسك
زلزل أسرك
أصلك شعباً صعباً كسرك
وحد بأسك
انت المجد مقاسو مقاسك
والقهروك زوالم شمسك
كل الأيدي وكت تتماسك
تكتب نصرك
تهزم ليلك وظلمة حبسك
حرر نفسك بي إيديك
عندك زودك وحمرة عينك
ودخري الحوبة شبابك زينك
علّي هتافك.....أدي شراع الهنا مجدافك
خلي الخوف يخشاك ويخافك
ويبقى رماد البينو وبينك
كل الدنيا بتسأل عنك ...
يا مبدع ثوراتك .......... وينك؟


انت الزيّك ما بتذل
كم من ظالم ظلمك و ولى
أنا متفائل بيك و بحلم
بل متأكد ما بتتخلى
ما بتتفرج ..... تفضل ساكت
و حفنة تقبقب في خلق الله
أنا متفائل بيك وعارف
إنك يوماُ ما بتتخلى
تبقى حديث العالم كلو
إذاعة .. إذاعة …. جريدة ..جريدة
مجلة مجلة
يملا الشاشة ثباتك
وضو عافيتك
وعلمك وقلمك وجلابيتك
وقدلة ولدك وجدلة بتك
ونيلاً قلدك جنب طابيتك
ما من بيتك يا الحبيتك
كل من ظلمك ولا تربيتك
قدرتك إنت وإمكانيتك
شامخ تبني ديمقراطيتك
وعزة بلدك ورفعة شانك

يا متعدد وواحد ابداً
تحيا العشرة البين أديانك
وسلم حقيقي يزيدك عددا
ويبقى عنان السما عنوانك
صورة العضو الرمزية
عدنان زاهر
مشاركات: 287
اشترك في: الاثنين مايو 09, 2005 8:52 pm

سلام

مشاركة بواسطة عدنان زاهر »

التحية مصطفى و ياسر

الله يدى شاعر الناس محجوب،الانسان،الرقيق و المصادم العافية.

عدنان زاهر
ياسر الشريف المليح
مشاركات: 1745
اشترك في: الاثنين مايو 09, 2005 7:24 pm
مكان: ألمانيا
اتصال:

أقول دون رهبة.. أقول دون زيف.. محجوب شريف

مشاركة بواسطة ياسر الشريف المليح »

تسلم يا عدنان
وسلام للجميع.. هناك قصيدة أخرى سجلتها للأستاذ محجوب شريف يوم السبت 23 يونيو أيضا، وعنوانها "عرض اكتافكم روِّحوا يلاَّ" اخترت أن أجعل لها بوستا منفصلا هنا:

https://sudan-forall.org/forum/viewtopic ... 91fd7b40ae

وهذه قصيدة أخرى قمت بستجيلهافي نفس اليوم، والقصيدة قديمة ولكنه تذكرها بقوة عندما سرت شائعة خبيثة بموته وانتشرت قبل عدة قبل أسبوعين تقريبا.

https://youtu.be/auvxd6maEaI
https://www.youtube.com/v/auvxd6maEaI


أقول دون رهبة
أقول دون زيف
أموت لا أخاف
أين أو متى وكيف
بغتة مستمتعا
بأنجم السماء
ليل صيف
رصاصة في القلب
طعنة من سيف
أموت لا أخاف
أين أو متى وكيف
أموت في الظلام
في الزحام
تحت غفلة
بساحل الطريق
حريق
غريق
أموت في سريري
زوجتي بنتاي
جيرتي عشيرتي
وأصدقائي
قطتي راكوبتي وزيري
معززا مكرما مهندما
بناصع البياض
موكب يحفني
لمرقد أخير
أموت لا أخاف
كيفما يشاء لي مصيري
أموت لا أخاف
قدرما أخاف
أن يموت لحظة ضميري

ياسر الشريف المليح
مشاركات: 1745
اشترك في: الاثنين مايو 09, 2005 7:24 pm
مكان: ألمانيا
اتصال:

قدر الثبات .. ضد السُّكات.. محجوب شريف

مشاركة بواسطة ياسر الشريف المليح »

وهذه القصيدة الرابعة التي سجلناها للأستاذ محجوب شريف يوم السبت 23 يونيو 2012

https://youtu.be/ssu4fYBGua8
https://www.youtube.com/v/ssu4fYBGua8

قدر الثبات.. ضد السكات
أغسطس 1989، قسم المديرية في سجن كوبر

محجوب شريف

جيناك
وكنا طلعنا منك
نحن مرفوعي الرؤوس
جيناك مرفوعي الرؤوس
أفتح زنازينك
أهو بنفتح صدورا ما بتكوس
الرحمة تبْ
ما فينا مِرْقاً فيهو سوس
بل فينا عِرقاً من جذور الشعب
عشقاً لا يُداس
نحن بندوس
على كل من عايز يدوس
نحن بندوس
جيناك وكنا طلعنا منك
عنوةً كدا واقتدار
تشهد ترابيسك هديك
وهدا الجدار
نهر الجماهير العميق
جلجل شديد الانحدار
زلزل حديد الانكسار
امتد حولك واستدار
وملا الطريق
فإذا بأسوار الضفاف
وسواعد الناس النخيل
حملتنا أمواج الهتاف
في ذلك الصبح الجميل
حملتنا أفواج الكفاف
ومدامع الفرح النبيل
الغدر ما ببْقى انتصار
والانكسار
المستحيل
المستحيل.. المستحيل
اسمعنا يا ليل السجون
نحن بنحب شاي الصباح
والمغربية مع الولاد
والزوجة والأم الحنون
والأصدقاء
وإلى اللقاء
واللّمة عند الأمسيات
والتكية جنب الأغنيات
والقدلة في السوق الكبير
نتمشى نغرق في الزحام
ملء العيون
بنحب كدا ونعشق تمام
إلا بْنكون قدر الثبات
ضد السُّكات
ضد التسكُّع والجنون
جنبا إلى جنب التماسك والحنين
أفتح زنازينك أهو بنفتح
شبابيك اليقين
ــــ
والآن شبابيك اليقين تفتح مشرعة في كل مساحات السودان
المجد لشعبنا ولشهدائه من كل عرق ولون ودين
أضف رد جديد